काठमाडौं (हाम्रो खेलकुद) – कर्णाली प्रदेशले ले वीर गणेशमान सिंह राष्ट्रिय टी–ट्वान्टी च्याम्पिनसिपमा दोस्रो जित निकालेको छ । मधेश प्रदेशलाई आइतबार ६ विकेटले हराउँदै कर्णालीले दोस्रो जित हात पारेको हो । मधेशको यो लगातार दोस्रो हार हो । कर्णालीको जितमा विपिन रावलले ४१ रन जोडे।

जितको लागि १ सय २१ रनको लक्ष्य कर्णालीले १५.३ ओभरमा ४ विकेटको नोक्सानीमा सहजै पूरा गर्यो । कर्णालीको जितमा विपिन रावलले ४० बलको सामना गर्दै २ चौका र २ छक्काको मद्दतले ४१ रन बनाए । हिमान्सु शाही नटआउट ३२ रनमा रहे । रविन्द्र शाहीले १४ रन जोडे । बलिङमा मधेशका प्रदीप पासवान र अभिषेक तिवारीले २/२ विकेट लिए।\

त्यसअघि टस जितेर पहिले ब्याटिङ गरेको मधेशले संघर्ष गर्दै ९ विकेट गुमाएर १ सय २० रन जोड्यो । मयान यादवले सर्वाधिक ३६ रन बनाए भने दशौं क्रमका विशाल पटेलले नटआउट ३२ रन बनाए । प्रदीपले १८ रन जोडे। यी तीन बाहेक अन्यले दोहोरो रन छुन सकेनन् ।

बलिङमा कर्णालीका उनीस ठकुरीले २ विकेट लिंदा दिवान पुन, दीपेन्द्र रावत, दिनेश अधिकारी र प्रकाश जैसीले समान १/१ विकेट लिए । कर्णालीले ४ अंक छ । ४ खेलमा मधेशको नि ४ अंक नै छ ।

च्याम्पियनसिपमा दिनको पहिलो खेलमा सुदूरपश्चिम प्रदेशले कोशी प्रदेशलाई रोमाञ्चक खेलमा ३ रनले हराएको थियो ।