काठमाडौं (हाम्रो खेलकुद) – गौतम केसीले सानदार बलिङ गर्दै ५ विकेट लिंदा बागमती प्रदेशले कर्णाली प्रदेशमाथि वीर गणेशमान सिंह राष्ट्रिय टी-ट्वान्टी च्याम्पिनसिपमा ७ विकेटको सहज जित निकालेको छ।

बागमतीको जितमा गौतमको बलिङ नै प्रमुख बन्यो। बागमतीको यो लगातार चौथो जित हो र ८ अंक सहित शीषस्थानमा उक्लिएको छ।

जितको लागि १ सय २१ रनको सहज लक्ष्य बागमतीले १४.५ ओभरमा मात्र ३ विकेट गुमाउँदै पूरा गर्यो। ओपनर आशुतोष घिरैया र कप्तान रित गौतमले पहिलो विकेटको लागि ४९ रनको साझेदारी गरे।

आशुतोषले २० रन बनाए भने रितले ३३ रन जोडे। यसैगरी इशान पाण्डे अविजित २८ रनमा रहँदा शुभ कंसाकारले २८ रन बनाउँदा ३१ बल अगाडि नै ७ विकेटको जित हात पार्न सफल रहयो। बलिङमा अनुज चनारा, दिनेश अधिकारी र उनिश ठकुरीले समान १/१ विकेट लिए।

त्यसअघि पहिले ब्याटिङ गरेको कर्णाली प्रदेशले १९.४ ओभरमा सम्पुर्ण विकेट गुमाउँदै १ सय २० रनमा समेटियो।

विपिन शाही बाहेक अन्य ब्याटर क्रिजमा टिक्न सकेनन्। उनले अर्धशतकीय पारी खेल्दै ५१ रन बटुले। प्रकाश जैसीले २३ रन, मनिष थापाले १६ र हिमांशु शाहीले १५ रन बनाए। यी बाहेक अन्यले दोहोरो रन छुन सकेनन्।

कर्णालीको इनिङसलाई धरापमा पार्न गौतम नायक बने।‌ उनले ३ ओभर ४ बल बलिङ गर्दै १८ रन खर्चेर ५ विकेट लिए। रिजन ढकाल र सोनु देवकोटाले २/२ विकेट लिए।
५ खेल खेलेको बागमतीको यो चौथो जित हो। कर्णालीसँग भने ६ अंक रहेको छ।