काठमाडौँ (हाम्रो खेलकुद) – सुदुरपश्चिम प्रदेशले तेस्रो संस्करणको ललितपुर मेयर्स कप २०८१ महिला क्रिकेट प्रतियोगितामा लगातार दोस्रो जित दर्ता गरेको छ । कोशीलाई लगातार दोस्रो हार चखाउने क्रममा सुदुरले १९ रनको जित दर्ता गर्यो । 

टस जितेर पहिला ब्याटिङ गरेको सुदुरपश्चिम प्रदेशले सम्झना खड्काको अर्धशतकीय इनिङको मद्दतमा निर्धारित २० ओभरमा ८ विकेटको क्षतिमा ११२ रन जोड्यो । सम्झनाले ५१ बलमा ४ चौकासहित ५४ रन बनाउन सफल रहिन् । सम्झनाले प्रतियोगिताको पहिलो अर्धशतक प्रहार गरेकी थिइन् ।

यस्तै ऋतु कनोउजियाले ३५ बलमा २३ रन जोडिन् भने कप्तान बिन्दु रावलले १४ बलमा २ चौका सहित १४ रन नै बनाइन् । अन्य ब्याटरले भने दोहोरो अंक छुन सकेनन् ।

कोशीका लागि सबनम राई, हिरणमाए रोय र संगिता राईले समान २-२ विकेट लिए । यस्तै एलिशा खडियाले एक विकेट लिन सफल भइन् ।  

जवाफमा कोशी प्रदेशले २० ओभर खेल्दै ७ विकेट गुमाएर ९३ रन मात्र बनाउन सक्यो । कोशीकी ओपनर काजल श्रेष्ठले ४० बल खेल्दै २ चौका प्रहार गर्दै ३३ रन जोडिन् । यस्तै कप्तान अप्सरी बेगमले ३४ बलमा ३ चौका सहित २३ रन बनाइन् । अन्य ब्याटरले भने दोहोरो अंक पुर्याउन सकेनन् ।   

सुदुरपश्चिमका लागि ऋतु कनोउजिया, लक्ष्मी साउद, जानकी थापा र बिन्दु रावलले समान १-१ विकेट लिए ।   

सुदुरले हिजो भएको पहिलो खेलमा आयोजक ललितपुर मेयर्स-११ लाई पराजित गरेको थियो । कोशीले भने एपिएफ विरुद्ध पराजय भोगेको थियो ।  

प्रतियोगितामा मंगलवार कुनै खेल रहेका छैनन् भने बुधवार दुई खेल हुँदै छन् । ९:३० बजे हुने खेलमा ललितपुरले एपिएफविरुद्ध खेल्नेछ भने दिनको १:३० बजे बागमती प्रदेशले कोशी प्रदेशको सामना गर्नेछ । 

सिंगल राउन्ड रोबिनका आधारमा खेलाइने प्रतियोगितामा २ टोलीले उपाधिको लागि फाइनलमा प्रतिस्पर्धा गर्नेछन् ।