काठमाडौँ (हाम्रो खेलकुद) – नेपाल एपिएफ क्लब काठमाडौँमा जारी ललितपुर मेयर्स कप २०८१ को फाइनलमा प्रवेश गरेको छ । प्रतियोगितामा लगातार तेस्रो जित दर्ता गर्दै उपाधि दावेदार एपिएफ एक खेल बाँकी छँदै फाइनलमा प्रवेश गरेको हो ।

एपिएफको ३ खेलमा ६ अंक भएको छ । दोस्रो स्थानको सुदूरपश्चिमले २ खेलमा ४ अंक नै बटुलेको छ । ललितपुरको ३ खेलमा २ अंक रहेको छ भने कोशी प्रदेश र बागमती प्रदेश समान २-२ खेलमा अंकविहिन छन् ।  

बुधवार तेस्रो जित हासिल गर्ने क्रममा एपिएफले आयोजक ललितपुर मेयर्स-११ लाई ८ विकेटले पराजित गरेको हो । ललितपुरले दिएको ७२ रनको सामान्य लक्ष्य एपिएफले २ विकेट गुमाएर ९.५ ओभरमै पुरा गर्यो ।

एपिएफका लागि कप्तान सिता राना मगरले ३५ बलमा ८ चौका सहित ५० रनको अर्धशतकीय इनिङ खेलिन् । यस्तै अर्की ओपनर ममता चौधरीले २१ बलमा १ चौका सहित १६ रन बनाइन् । इन्दु वर्मा र रोमा थापा समान १-१ रन बनाएर अविजित रहे ।

ललितपुरका लाग कृतिका मरासिनीले दुवै विकेट लिइन् ।  

त्यसअघि टियु क्रिकेट मैदानमा टस जितेर ब्याटिङ गरेको ललितपुरले निर्धारित २० ओभरमा ५ विकेटको क्षतिमा ७१ रन मात्र बनाउन सक्यो । ललितपुरका दुई ब्याटरले मात्र दोहोरो अंकमा रन बनाउन सके । कप्तान पुजा महतोले ३९ बलमा १ चौका सहित २४ रन बनाइन् । यस्तै ज्योत्स्निका मरासिनीले ३९ बलमा १ चौका नै प्रहर गर्दै २१ रन जोडिन् ।

एपिएफका लागि रेखा रावल र कप्तान सिता राना मगरले समान १-१ विकेट लिए ।

प्रतियोगिता अन्तर्गत आजको दोस्रो खेलमा पुछारका दुई जितविहिन टोली कोशी प्रदेश र बागमती प्रदेश भिड्दै छन् ।

५ टोली सम्मिलित यस प्रतियोगिता सिंगल राउण्ड रोबिनका आधारमा हुँदैछ भने लिग चरणका शीर्ष दुई टोलीले उपाधिका लागि आउँदो शनिवार खेल्ने छन् ।