काठमाडौं (हाम्रो खेलकुद) – नेपालले दोस्रो दृष्टिबिहिन टि ट्वान्टी विश्व कप क्रिकेट प्रतियोगितामा अर्को हार बेहोरेको छ । नेपाल मंगलबार इङ्ल्यान्डसँग ९० रनले पराजित भएको हो । प्रतियोगितामा नेपालको यो पाँचौं हार हो । यस अघि अस्ट्रेलिया, बंगलादेश, पाकिस्तान, वेस्ट इन्डिज र श्रीलंकासँग पनि पराजित नेपालले दक्षिण अफ्रिकामाथि जित हासिल गरेको थियो ।

विश्वकपमा इङ्ल्यान्डसँग नेपालको यो दोस्रो हार हो । यस अघि सन् २०१२ को पहिलो टि ट्वान्टी विश्वकपमा नेपाल १० विकेटले पराजित भएको थियो । बेङ्लोरको अलुर स्थित केएससिए मैदानमा टस जिती पहिले ब्याटिङ गरेको इङ्ल्यान्डले निर्धारित २० ओभरमा ५ विकेट गुमाउदै २ सय ३३ रन बनाएको थियो । जवाफमा नेपालले ७ विकेट गुमाउँदै १ सय ४३ रन बननाएको थियो ।

नेपालका लागि बी वान क्याटेगोरीका सुनिल सुबेदी क्षेत्रीले ४४ बलमा ४२ रन र सुनिल थापा मगरले ३४ बलमा २ चौका साथ ३० रन बनाए । इङ्ल्यान्डका लुक सग र जस्टिन फलिनजर्सरीले नेपालको समान २ विकेट लिए । यस्तै कप्तान किर्तन श्रेष्ठ दुवालले १९ बलमा २ चौका प्रहार गर्दै २७ रन जोडे । अन्य ब्याट्सम्यानले गतिलो प्रदर्शन गर्न सकेनन् ।

त्यसअघि इङ्ल्यान्डका लागि लुक सगले शतक पुरा गरेका थिए । ६२ बलमा ८ चौकाका साथ एक सय रन पुरा गरेका हुन् । पिटर ब्लुइटले ४३ बलमा २ चौकासहित ६० रनको योगदान गरे । उनले दुई चौका प्रहार गरेका छन् । नेपालका पदम बडइलाले २ तथासुनिल थापा मगरले १ विकेट लिए ।

हारपछि नेपाली टोलीका प्रशिक्षक रीजन प्रजुले भने ‘बलिङ र फिल्डिङमा सुधार भयो ।सुरुवातका राम्रा ब्याट्सम्यानलाई सस्तैमा आउट गर्न सफल भए पनि त्यसपछिका ब्याट्सम्यानले इङ्ल्यान्डलाई राम्रो योगफलमा पु¥याए ।’