काठमाडौं (हाम्रो खेलकुद) – अमेरिकाले आईसीसी क्रिकेट विश्वकप लिग टु मा नामिबियामाथि ६ विकेटको जित हात पारेको छ ।

नामिबियाले विन्डोहकमा दिएको २ सय रनको लक्ष्य अमेरिकाले ४१.३ ओभरमा ४ विकेट गुमाउँदै पूरा गरेको थियो । अमेरिकाको जितमा कप्तान मोनांक पटेलले ८२ बलमा ७ चौका र १ छक्कासहित सर्वाधिक ७२ रन बनाए ।

साइतेजा मुककामल्ला ७४ बलमा ४ चौका र १ छक्कासहित ६४ रनमा नट आउट रहँदा सुशान्त मोदानीले ३६ रन बनाए ।नामिबियाका जेरार्ड इरास्मसले २ र टांगेनी लुंगामेनीले १ विकेट लिए ।

त्यसअघि टस ब्याटिङको निम्तो पाएको नामिबियाले ५० ओभरमा ९ विकेट गुमाउँदै १ सय ९९ रन बनाएको थियो । नामिबियाका जान फ्रेलिंकले ८८ बलमा ७ चौकासहित सर्वाधिक ७० रन बनाए । जेजे स्मिथले ७५ बलमा ३ चौका र ३ छक्कासहित ४९ रन जोडे ।

अमेरिकाका सौरभ नेत्रवालकर, जुआनोय ड्रिसडेल र मिलिन्द कुमारले २–२ विकेट लिए । अमेरिका, यूएई र नामिबियाबीच यस लिग २ को त्रिकोणात्मक सिरिजमा प्रतिस्पर्धा आजदेखी सुरु भएको छ ।

अर्को लिग २ को त्रिकोणात्मक सिरिजमा क्यानडा, नेपाल र ओमानबीच प्रतिस्पर्धा हुँदैछ । नेपाल र क्यानडाबीचको खेल जारी छ । नामिबियालाई हराएको अमेरिका ६ अंकका साथ पाँचौ स्थानमा छ । पराजित नामिबिया ८ अंकका साथ चौथो स्थानमा छ ।

नेदरल्यान्ड्स शीर्ष स्थानमा रहॅंदा २ अंक जोडेको नेपाल पुछारबाट दोस्रो स्थानमा छ । लिग टु मा ८ टोली सहभागी रहेका छन् ।