काठमाडौं (हाम्रो खेलकुद) – नरेश मेमोरियल राष्ट्रिय यु १९ क्रिकेट प्रतियेगितामा बागमती प्रदेशले विजयी सुरुवात गरेको छ ।

प्रतियोगितामा आफ्नो पहिलो खेलमा जित हात पार्ने क्रममा सोमवार भएको बागमतीले गण्डकी प्रदेशमाथि १ सय रनले हराएको छ।

२ सय ३० रनको लक्ष्य पछ्याएको गण्डकीले ३६ ओभरमा अल आउट हुँदै हुदै १ सय २९ रन मात्र जोड्यो ।

गण्डकीका कप्तान अर्जुन कुमालले ५२ बलमा सर्वाधिक ३१, क्याब्रिन श्रेष्ठले २९, रोहत चन्दले २१ तथा सुजन गौतमले १६ रन जोडे । बागमतीका लागि दिपक सेरला र दिनेश विष्टले समान ३ तथा दयानन्द मण्डलले २ विकेट लिए ।

त्यसअघि गिरिजा प्रसाद कोइराला क्रिकेट मैदान विराटनगरमा टस हारेर ब्याटिङको निम्तो पाएको बागमतीले निर्धारित ५० ओभरमा ५ विकेट गुमाएर २ सय २९ रन जोडेको थियो ।

बागमतीका नितिश कुमारले ५१ बलमा २ चौका र ३ छक्काको सहयोगमा नट आउट रहँदै सर्वाधिक ५३ रन जोडे ।

कप्तान उत्तम थापाले ४०, रिनजिन लामाले ३९, रोसन विकले २६ तथा सुर्यान्शु कोइरालाले २० रन जोडे । गण्डकीका लागि किरण भट्टराईले ३ तथा सुदिप अर्याल र अपराजित पौडेलले समान १ विकेट लिए ।

बागमतीको २ अंक भएको छ । दोस्रो खेलमा पहिलो हार बेहोरेको गण्डकीको पनि २ अंक छ । कात्तिक २१ सम्म चल्ने प्रतियोगितामा ७ प्रदेशको सहभागिता छ । सिङ्गल राउण्ड रोविनमा हुने प्रतियोगिताको शीर्ष २ टोली फाइनल खेल्नेछन् ।