काठमाडौं(हाम्रो खेलकुद) – कप्तान आकाश त्रिपाटीको अलराउण्ड प्रदर्शनमा लुम्बिनी प्रदेशले विराटनगरमा जारी नरेश स्मृती यू १९ राष्ट्रिय क्रिकेट प्रतियोगितामा आफ्नो अपराजित यात्रा जारी राखेको छ ।

चौथो खेलमा जितलाई निरन्तरता दिने क्रममा लुम्बिनीले बिहओ बागमती प्रदेशलाई १ सय २ रनले हरायो ।

२ सय ७९ रनको लक्ष्य पछ्याएको बागमतीले ४४.४ ओभरमा अल आउट हुँदै १ सय ७६ रन मात्र बनाउन सक्यो ।

बागमतीका रोशन विकले ६६ बलमा ७ चौका र ३ छक्काको सहयोगमा नट आउट ७३ रन जोडे । ओपनर सुर्याशुं कोइरालाले ४७ बलमा ३२, राजेश बोहोराले २१ तथा नितिश कुमारले १३ रन जोडे ।

लुम्बिनीका कप्तान आकाश र सन्तोष यादवले समान ३ तथा महेश भार र रमेश कुर्मीले समान १ विकेट लिए ।

त्यसअघि टस जितेर ब्याटिङ रोजेको लुम्बिनीले निर्धारित ५० ओभरमा ७ विकेट गुमाएर २ सय ७८ रन बनाएको थियो ।

लुम्बिनीका कप्तान आकाशले ९८ बलमा ११ चौका र १ छक्काको सहयोगमा ७७ रन जोडे । सन्तोष यादवले ६१ बलमा ७ चौका र १ छक्काको सहयोगमा ६३ रन बनाए । दिल्शाद अलिले ३६ बलमा ५ चौका र २ छक्काको सहयोगमा ५४ तथा सेराज भगवानले २१ रन बनाए ।

बागमतीका लागि दयानन्द मण्डल र दिनेश बिष्टले समान २ तथा दिपक सेरला र रोशन विकले समान १ विकेट लिए ।

८ अंकका साथ लुम्बिनी शीर्ष स्थानमा छ । लगातार दोस्रो हारका साथ बागमती प्रदेश पाँचौ स्थानमा छ । कात्तिक २१ सम्म चल्ने प्रतियोगितामा ७ प्रदेशको सहभागिता छ । सिङ्गल राउण्ड रोविनमा हुने प्रतियोगिताको शीर्ष २ टोली फाइनल खेल्नेछन् ।