एजेन्सी – सन्जु स्यामसन र तिलक बर्माको शतक सहयोगमा पाहुना टोली भारतले चौथो टि ट्वान्टी आईमा दक्षिण अफ्रिकाममाथि फराकिलो जित हात पारेको छ ।

शुक्रवार भएको चौथो टि ट्वान्टी आई भारतले १ सय ३५ रनको फराकिलो अन्तरले पराजित गर्यो । चौथो खेलमा जितसँगै भारतले चार खेलको टि ट्वान्टी आई सिरिज ३-१ ले जितेको छ ।

भारतले दिएको २ सय ८४ रनको विशाल लक्ष्य पछ्याएको दक्षिण अफ्रिका १८.२ ओभरमा १ सय ४८ रनमा अल आउट भयो । दक्षिण अफ्रिकाका लागि ट्रिस्टन स्टब्सले २९ बलमा ३ चौका र २ छक्काको सहयोगमा सर्वाधिक ४३ रन जोडे । डेविड मिलरले २७ बलमा २ चौका र ३ छक्काको सहयोगमा ३६, मार्को यानसनले १२ बलमा नट आउट २९ तथा जेहार्ड कोट्जेले ८ बलमा १२ रन बनाए ।

भारतका लागि अर्शदिप सिंहले ३, वरुण चक्रवर्ती र अक्षर पटेलले समान २ तथा रवि बिश्नोइ, हार्दिक पाण्ड्या र रमनदिप सिंहले समान १ विकेट लिए ।

त्यसअघि दक्षिण अफ्रिकाको जोहनेसवर्गमा टस जितेर ब्याटिङ गरेको पाहुना टोलीले निर्धारित २० ओभरमा १ विकेट गुमाएर २ सय ८३ रनको विशाल योगफल तयार गरेको थियो । भारतका लागि ओपनर सन्जु स्यामसन तथा तिलक बर्माले नट आउट रहदै शतक पूरा गरे । तिलकले ४७ बलमा ९ चौका र १० छक्काको सहयोगमा नट आउट १ सय २० रन जोडेका थिए ।

ओपनर सन्जुले ५६ बलमा ६ चौका र ९ छक्काको सहयोगमा १ सय ९ रन जोडेका थिए । दोस्रो विकेटका लागि सन्जु र तिलकले २ सय १० रनको नट आउट साझेदारी गरे । यो भारतको टि ट्वान्टी इतिहासमा कुनै पनि विकेटका लागि भएको सर्वाधिक साझेदारी हो ।

टोलीका अर्का ओपनर अभिषेक शर्माले १८ बलमा २ चौका र ४ छक्काको सहयोगमा ३६ रन जोडेका थिए । घरेलु टोलीका लागि लुथो सिपाम्लाले १ विकेट लिए । सिरिजको पहिलो, तेस्रो र चौथो खेल भारतले जितेको थियो । दोस्रो खेलमा भने दक्षिण अफ्रिका विजयी भएको थियो ।