एजेन्सी – घरेलु टोली जिम्बाब्वेले पाकिस्तानमाथि पहिलो ओडिआईमा जित हासिल गरेको छ ।

आइतवार भएको पहिलो ओडिआईमा जिम्बाब्वेले पाकिस्तानलाई डकवर्थ लुईस मेथडमा ८० रनले पराजित गरेको हो । जितसँगै तीन खेलको ओडिआई सिरिजमा जिम्बाब्वेले १-० को अग्रता बनाएको छ ।

जिम्बाब्वेले दिएको २ सय ६ रनको मध्यम लक्ष्य पछ्याउँदै ब्याटिङमा उत्रिएको पाकिस्तानले २१ ओभरमा ६ विकेट गुमाएर ६० रन बनाएको अवस्थामा बर्षाका कारण खेल रोकिएको थियो । वर्षाका कारण खेल फेरी सुचारु हुन नसकेपछि डिएल मेथडमा पाकिस्तान ८० रनले पराजित भएको हो ।

वर्षा अघि पाकिस्तानका लागि कप्तान मोहम्मद रिजवानले नट आउट १९ तथा कमरान गुलामले १७ रन जोडेका थिए । जिम्बाब्वेका लागि सिकन्दर राजा, सेन विलियम्स र ब्लेसिङ मुजरबानीले समान २ विकेट लिए ।

त्यसअघि हरारेमा रहेको क्विन्स स्पोट्स क्लबमा टस हारेर ब्याटिङको निम्तो पाएको जिम्बाब्वेले ४०.२ ओभरमा अल आउट हुदै २ सय ५ रन मात्र जोड्न सक्यो । जिम्बाब्वेका लागि रिचार्ड नगर्भाले ५२ बलमा ४८, सिकन्दर राजाले ५६ बलमा ३९, टान्डिवान्सी मुरामनीले ४१ बलमा २९ तथा सेन विलियम्सले १७ बलमा २३ रन जोडेका थिए ।

पाकिस्तानका लागि सलमान आगा र फैसल अकरमले समान ३ तथा आमिर जमाल, मोहम्मद हसाइन र हरिस रउफले समान १ विकेट लिए । दुई देशबीचको दोस्रो ओडिआई खेल मंगलवार हुनेछ ।