काठमाडौं(हाम्रो खेलकुद) – सिद्धार्थ बैंक नेपाल प्रिमियर लिग(एनपिएल)को लागि फ्रेन्चाइज टोली सुदूरपश्चिम रोयल्समा अनुबन्ध इङ्ग्लिस क्रिकेटर सेफ अली जेब नेपाल आइपुगेका छन् ।

सुदूरपश्चिममा अनुबन्ध सेफलाई बुधवार त्रिभुवन अन्तर्राष्ट्रिय विमानस्थलमा टिम व्यबस्थापक रवि तिमल्सिना लगायतले स्वागत गरेका थिए ।

सुदूरपश्चिममा सेफका अलावा स्कटल्यान्डका ब्रान्डन मक्मलेन, न्युजिल्यान्डका स्कट कुगेलेइन र युएईका रोहन मुस्तफा विदेशी खेलाडीहरु टोलीमा समावेश गरेको छन् ।

सुदूरपश्चिमको मार्की खेलाडीमा अलराउन्डर दिपेन्द्र सिंह ऐरी रहेका छन् । मेन्टरमा अष्ट्रेलियाका ब्राड हज र मुख्य प्रशिक्षकमा जगत टमाटा रहेका छन् । सुदूरपश्चिमले आफ्नो कोटाका ४ विदेशी खेलाडीलाई पनि अनुबन्ध गरिसकेको छ ।

त्यस्तै नेपाली खेलाडीहरुमा आरिफ शेख, अभिनास बोहोरा, विनोद भण्डारी, अर्जुन कुमाल, खडक बोहोरा, इशान पाण्डे, नरेश बुढाऐर, भोजराज भट्ट, नरेन साउद , अमित श्रेष्ठलाई अक्सन मार्फत टिममा भित्र्याएको थियो । अर्जुन र नरेन भने हाल यू १९ टोलीमा रहेर एसिया कपको तयारीमा छन् ।

नेपाल क्रिकेट संघ(क्यान) को आयोजनामा शनिवार देखि पुस ६ गतेसम्म एनपिएलको पहिलो संस्करण हुँदैछ । मंसिर १८ गते विराटनगर किङ्ससँग खेल्दै सुदूरपश्चिमले लिगको सुरुवात गर्नेछ ।

सुदूरपश्चिम रोयल्सको खेलतालिका

मंसिर १८ गते- विराटनगर किङ्सविरुद्ध बिहान ९ः१५ बजे
मंसिर २० गते- काठमाडौं गुर्खाजविरुद्ध दिउँसो १ः१५ बजे
मंसिर २२ गते- लुम्बिनी लायन्सविरुद्ध बिहान ९ः१५ बजे
मंसिर २३ गते- चितवन राइनोजविरुद्ध दिउँसो १ः१५ बजे
मंसिर २६ गते- जनकपुर बोल्ट्सविरुद्ध बिहान ९ः१५ बजे
मंसिर ३० गते- पोखरा एभेन्जर्सविरुद्ध दिउँसो १ः१५ बजे
पुस १ गते- कर्णाली याक्सविरुद्ध बिहान ९ः१५ बजे