एजेन्सी – ओपनर रिजा हेन्ड्रिक्सको शतकमा घरेलु टोली दक्षिण अफ्रिकाले दोस्रो टि ट्वान्टी आईमा पनि शुक्रवार पाकिस्तानलाई‌ पराजित गरेको छ। योसँगै दक्षिण अफ्रिकाले अन्तिम खेलअघि नै सिरिज जितेको छ।

दक्षिण अफ्रिकाले पाकिस्तानमाथि ७ विकेटको जित हात पार्यो । २ सय ७ रनको फराकिलो लक्ष्य १९.३ ओभरमा ३ विकेट गुमाएर पूरा गर्यो ।

दक्षिण अफ्रिकाको जितमा हेनड्रिक्सले सर्वाधिक १ सय १७ रन जोडे । उनले ६३ बलमा ७ चौका र १० छक्का प्रहार गरे । उनलाई अब्बास अफ्रिदीले १८औं ओभरको चौथो बलमा इरफान खानबाट क्याच गराए ।

तेस्रो विकेटका लागि हेनड्रिक्स र राशी भान डर डुसनसँग मिलेर १ सय ५७ रनको साझेदारी गर्दै टोलीलाई जितसम्म पुर्याएका थिए ।

डुसनले ३८ बलमा ३ चौका र ५ छक्काको सहयोगमा नट आउट ६६ रन जोडे । डुसन र हेनरिक क्लेसनले चौथो विकेटका लागि नट आउट २५ रनको साझेदारी गरे । क्लासेनले ५ बलमा नट आउट ८ रन जोडे ।

पाकिस्तानका लागि जहादद खानले २ तथा अब्बास अफ्रिदीले १ विकेट लिए ।

त्यसअघि सेन्चुरियनमा टस जितेर ब्याटिङ गरेको पाकिस्तानले निर्धारित २० ओभरमा ५ विकेट गुमाएर २ सय ६ रनको योगफल तयार गरेको थियो ।

पाकिस्तानका लागि युवा ओपनर सैयम अयुबले सर्वाधिक ९८ रन जोडे । उनले ५७ बलमा ११ चौका र ५ छक्का प्रहार गरे । बाबर अजामले २० बलमा ३ चौका र १ छक्काको सहयोगमा ३१ रन जोडे ।

इरफानले १६ बलमा ३० तथा कप्तान मोहम्मद रिजवान ११ रनमा आउट भए । अब्बनस अफ्रिदी ४ बलमा ११ रन जोड्दै नट आउट रहे ।

दक्षिण अफ्रिकाका आटनिल ब्राटमन र दयान घलिमले समान २ तथा जर्ज लिन्डेले १ विकेट लिए । पहिलो टि ट्वान्टी आईमा पाकिस्तान ११ रनले पराजित भएको थियो । तेस्रो खेल शनिवार रहेको छ ।