एजेन्सी – बोर्डर गावास्कर ट्रफी अन्तर्गतको चौथो टेस्टमा घरेलु टोली अस्ट्रेलियाले राम्रो सुरुवात गरेको छ ।

अस्ट्रेलियाको मेलवर्न क्रिकेट स्टेडियममा जारी खेलमा टस जितेर ब्याटिङ सुरुवात गरेको अस्ट्रेलियाले पहिलो दिनको खेल सकिदा ६ विकेट गुमाएर ३ सय ११ रन जोडेको छ । अस्ट्रेलियाका स्टिभ स्मिथ ६८ रनमा नट आउट रहँदा कप्तान प्याट कमिन्स ८ रनमा नट आउट छन् ।

त्यसअघि अस्ट्रेलियाका ओपनर साम कोन्स्टास, अर्का ओपनर उस्मान ख्वाजा र मार्नस लाबुस्छेनले अर्धशतक बनाए । यसै खेलमा टेस्ट डेब्यु गरेका कोन्स्टासले ६५ बलमा ६ चौका र २ छक्काको सहयोगमा ६० रन जोडे । ख्वाजाले १ सय २१ बलमा ५७ तथा लाबुस्छेनले १ सय ४५ बलमा ७२ रन जोडे ।

उत्कृष्ट सुरुवात गरेको अस्ट्रेलियाले पछिल्ला विकेटहरु सस्तैमा गुमाएको थियो । एक समय २ सय ३७ रन जोड्दा मात्र २ विकेट गुमाएको अस्ट्रेलियाले ७४ रन थप्दा ४ विकेट गुमाएको थियो । एलेक्स केरीले ४१ बलमा ३१ रन जोडे । मिचेल मार्श ४ रनमा आउट हुँदा ट्रभिस हेडले रनको खाता खोल्न सकेनन् ।

भारतका लागि जसप्रित बुमराहले ३ तथा आकाश दिप, वासिटंन सुन्दर र रविन्द्र जडेजाले समान १ विकेट लिए । पहिलो टेस्ट २ सय ९५ रनले गुमाएको अस्ट्रेलियाले दोस्रो टेस्ट १० विकेटले जितेको थियो । तेस्रो टेस्ट बराबरीमा समाप्त हुँदा पाँच खेलको टेस्ट सिरिज १-१ को बराबरीमा छ ।