काठमाडौं(हाम्रो खेलकुद) – तारकेश्वर युवा क्लबको आयोजनामा जारी स्युचाटार क्रिकेट लिग इन्डोर टि-टेन प्रतियोगिताको तेस्रो दिन आइतवार ७ खेल भएका छन् ।

आजको खेलमा बिएमडिमएस, स्टुडियो सेभेन, किंग्स क्रिकेट एकेडेमी, बिडिएस, ग्रेट हिमालय क्रिकेट एकेडेमी र कालिका वारियर्स विजयी भएका छन् ।

पहिलो खेलमा समुह सी अन्तर्गत बिएमडिएसले स्याङ्जालाई ३२ रनले पराजित गर्यो । ९० रनको लक्ष्य पाएको स्याङ्जाले ५७ रनमा नै अल आउट भएको थियो । प्लेयर अफ द म्याच घोषित बिएमडिएसका निरज भट्टले ३ विकेट लिनुको साथै १५ रन पनि बनाए ।

दोस्रो खेलमा समुह बि अन्तर्गत स्टुडियो सेभेनले नेक्सस क्रिकेट एकेडेमीलाई १४ रनले पराजित गर्यो । ७० रनको लक्ष्य पाएको नेक्ससले ५५ रनमा अल आउट भयो । प्लेयर अफ द म्याच घोषित सन्देश क्षेत्रीले ३ विकेट लिए।

तेस्रो खेलमा समुह बि अन्तर्गत किंग्स क्रिकेट एकेडेमीले लगातार चौंथो जित दर्ता गर्ने क्रममा स्मार्ट ए केयरलाई ४१ रनले पराजित गर्यो ।

८६ रनको लक्ष्य पछ्याउने क्रममा स्मार्ट ए केयरले ४४ रनमा अल आउट भयो । प्लेयर अफ द म्याच घोषित भएका आश्रय बस्नेतले २७ रन बनाए । किंग्स समुह विजेताको रुपमा क्वार्टरफाइनल प्रवेश गरेको छ।

चौथो खेलमा समुह सी अन्तर्गत बिडिएसले बिएमडिएसलाई १२ रनले पराजित गर्यो । ७९ रनको लक्ष्य पछाएको बिएमडिएसले ६६ रनमा अल आउट भयो । प्लेयर अफ द म्याच घोषित बिडिएसका बसन्त खत्रीले २३ रन बनाउनुको साथै १ विकेट लिए ।

पाँचौं खेलमा समुह डी अन्तर्गत लगातार तेश्रो जित दर्ता गर्ने क्रममा ग्रेट हिमालय क्रिकेट एकेडेमीले मिक्समाण्डुलाई १८ रनले पराजित गर्यो ।

८० रनको लक्ष्य पछ्याउने क्रममा मिक्समाण्डुले ६१ रन मात्र बनाउन सक्यो । खेलको प्लेयर अफ द म्याच घोषित क्रिस कार्कीले २ विकेट लिनुको साथै ७ रन पनि बनाए । जित पछि ग्रेट हिमालय क्वार्टरफाइनल पुग्ने पक्का भएको छ।

छैठौँ खेलमा टिम बिडिएसले लगातार तेश्रो जित दर्ता गर्ने क्रममा हिमालयन क्रिकेट एकेडेमीलाई ७० रनले पराजित गर्यो।

१ सय ४ रनको लक्ष्य पछाएको हिमालयन क्रिकेट एकेडेमीले ३३ रनमा सबै विकेट गुमायो । प्लेयर अफ द म्याच घोषित टिम बिडिएसका जतिन थापाले ५३ रन बनाए। जित पहि बिडिएस क्वार्टरफाइनल पुगेको छ।

सातौं खेलमा कालिका वरियर्सले स्याङ्जा एभेन्जर्सलाई ४६ रनले पराजित गर्यो। कालिकाले दिएको ८१ रनको लक्ष्य पछ्याउने क्रममा स्याङ्जाले ३४ रनमा सम्पूर्ण विकेट गुमायो। प्लेयर अफ द म्याच घोषित लकी कडायतले ३४ रन बनाए।

प्रतियोगिता अन्तर्गत सोमबार चौंथो दिन लिग चरणका ७ खेल हुनेछन्। प्रतियोगिता ७ दिन सम्म चल्नेछ।

लिग कम नकआउट आधारमा हुने प्रतियोगिताको विजेताले १ लाख र दोस्रो टोलीले ५० हजार रुपैयाँ प्राप्त गर्ने छन् । प्लेयर अफ सिरिजलाई १० हजार तथा उत्कृष्ट बलर र ब्याट्सम्यानलाई जनही ५ हजार रुपैयाँबाट पुरस्कृत गरिने छ ।