धनगढी (हाम्रो खेलकुद)- यसै महिना धनगढीमा अर्जुन ट्रफी राष्ट्रिय क्रिकेट प्रतियोगिता आयोजना हुने भएको छ ।

आयोजक गो ड्रिमर्सले माघ १९ गतेदेखि २८ गते सम्म अर्जुन ट्रफी हुने बिहीवार धनगढी क्रिकेट एकेडेमीमा पत्रकार सम्मेलनमार्फत जानकारी गरायो ।

प्रतियोगिताको तयारी अन्तिम चरणमा पुगेको बताइएको छ । अर्जुन ट्रफीलाई‌ नेपाल क्रिकेट संघ (क्यान) ले आफ्नो बार्षिक क्यालेण्डरमा समावेश गरेको गो ड्रिमर्सका अध्यक्ष सुवाश शाहीले जानकारी दिए ।

‘प्रतियोगिताका लागि फाप्ला अन्तराष्ट्रिय क्रिकेट मैदानमा ४ वटा पिच तयार भइसकेको छ । दर्शकका लागि अस्थायी प्यारापिट जडान गरिएको छ,’ अध्यक्ष शाहीले भने, ‘तयारी ९० प्रतिशत सकिएको छ ।’

धनगढी र सुदुरपश्चिम प्रदेशको क्रिकेटका सारथी रहेका स्वर्गीय अर्जुन खड्काको स्मृतिमा आयोजना गर्न लागेको अर्जुन ट्रफीमा झण्डै २० लाख रुपैयाँ पुरस्कार राखिएको छ ।

रनिङ ट्रफीको रुपमा टि ट्वान्टी फर्म्याटमा हुने प्रतियोगिताको विजेताले १० लाख र दोस्रो हुने टोलीले ५ लाख रुपैयाँ ट्रफी पाउनेछ ।

प्रतियोगिताको सर्वोकृष्ट खेलाडीले १ लाख , उत्कृष्ट ब्याटर, बलर र उदीयमान खेलाडी समा ५० हजार रुपैयाँ पाउनेछन् । प्रत्येक खेलको प्लेयर अफ द म्याचले १० हजार रुपैयाँ प्राप्त गर्नेछन् । प्रतियोगिता लिगकम नकआउटका आधारमा हुनेछ ।

प्रतियोगितामा ८ वटा टोलीको सहभागिता रहनेछ । जसमा डिसिए धनगढी, सिवाइसी अत्तरिया, क्रिकेट एक्सिलेन्स सेन्टर (सिइसी) काठमाण्डौं, फ्रेण्ड्स युथ क्लब डडेल्धुरा, घोडाघोडी–११ सुख्खड, न्यु होराइजन बुटवल, दशरथ चन्द एकेडेमी बैतडी र वोष्टन क्रिकेट झापा छन् ।

सहभागी टोलीमा ‘ए’ क्याटोगोरीका ४ जना, ‘बी’ क्याटोगोरीका ५ जना र बाँकी ‘सी’ क्याटोगोरीका गरी १४ खेलाडी राख्न पाउनेछन् ।

‘ए’ क्याटोगोरीमा नेपाली राष्ट्रिय टोलीका खेलाडी रहेका छन् । ‘बी’ क्याटोगोरीमा नेपाली टोली ‘ए’, यु १९ को राष्ट्रिय टोली र प्रदेश स्तरीय सिनियर खेलाडी रहेका छन् । ‘सी’ क्याटोगोरीमा यु १६ नेपाली राष्ट्रिय टोली, प्रदेशका यु १९ र यु १६ का खेलाडी र अन्य खेलाडी रहेका छन् ।

गो ड्रिमर्सका अध्यक्ष शाहीको नेतृत्वमा विगतमा धनगढी प्रिमियर लिग (डिपिएल) को आरम्भ गरिएको थियो ।

सुदूरपश्चिमका मुख्यमन्त्री शाहद्वारा ट्रफी अनावरण

सुदुरपश्चिम प्रदेशका मुख्यमन्त्री कमलवहादुर शाहले प्रतियोगिताको ट्रफी अनावरण गरे । मुख्यमन्त्री शाहले अर्जुन ट्रफी जस्ता प्रतियोगिताले क्रिकेटको समग्र विकासमा टेवा पुग्ने र क्रिकेटमा लागेकालाई हौसला मिल्ने बताए ।

मुख्यमन्त्री शाहले प्रतियोगिताको सफलताको शुभकामना व्यक्त गर्दै भने, ‘ प्रतियोगिता आयोजना लागि धन्यवाद । प्रदेश सरकार सहयोग समर्थन गर्न सदैव तयार छ ।’

सुदूरपश्चिमको क्रिकेट विकासमा स्वर्गीय अर्जुन खड्काको भूमिकालाई महत्वपूर्ण मानिन्छ । करिव ३० वर्ष क्रिकेटमा बिताएका खड्काको २०७२ मा ४५ वर्षको उमेरमा निधन भएको थियो ।