काठमाडौं(हाम्रो खेलकुद) – नेपाली राष्ट्रिय क्रिकेट टोलीका अलराउण्डर दीपेन्द्रसिंह ऐरी सम्मिलित गल्फ जायन्ट्सले अन्तर्राष्ट्रिय लिग (आईएल) टि ट्वान्टीमा पहिलो जित हासिल गरेको छ ।

गल्फले शनिवार दुवई क्यापिटल्सलाई ६ विकेटले पराजित गरेको छ । गल्फले चौथो खेलिसक्दा दीपेन्द्रले भने लिगमा डेब्युको अवसर पाएका छैनन् ।

१ सय ६६ रनको लक्ष्य गल्फले १८.१ ओभरमा ४ विकेट गुमाएर पूरा गर्यो । गल्फको जितमा प्लेयर अफ द म्याच समेत भएका ग्रेहार्ड एरास्मसले नट आउट रहदै सर्वाधिक ५० रन जोडे । उनले ३४बलमा ६ चौका र १ छक्का प्रहार गरे ।

जोर्डन कक्स २७ रनमा आउट हुँदा शिमरन हिटमायर ४१ रनमा नट आउट रहे । क्यापिटल्सका लागि फरहान खान, स्कट कुगेलेइन, ओबेद म्याकोइ र सिकन्दर राजाले समान १ विकेट लिए ।

त्यसअघि सारजहा क्रिकेट स्टेडियममा टस हारेर ब्याटिङको निम्तो पाएको क्यापिटल्सले निर्धारित २० ओभरमा ७ विकेट गुमाएर १ सय ६५ रन जोडेको थियो ।

क्यापिटल्सका लागि दासुन शनकाले नट आउट रहँदै ३३, कप्तान सिकन्दर राजा र बेन डुकले समान २८ तथा रोभमन पावेलले २५ रन जोडेका थिए ।

गल्फका लागि मार्क अदिर र आयान खानले समान २ तथा वाहिदुल्लाह जाद्रान, ब्लेसिङ मुजरवानी र उजाइर खानले समान १ विकेट लिए ।

शनिवार नै भएकाे कुशल मल्ल सम्मिलित डेजर्ट भाइपर्सले लगातार चाैथाे जित हात पारेकाे थियाे ।

जितसँगै गल्फ ३ खेलमा २ अंकका साथ चौथो स्थानमा छ । क्यापिटल्स ४ खेलमा २ अंकका साथ तालिकाको पुछारमा छ ।