काठमाडौं(हाम्रो खेलकुद) – नेपाली युवा अलराउण्डर कुशल मल्ल सम्मिलित डेजर्ट भाइपर्सले अन्तर्राष्ट्रिय लिग (आईएल) टि ट्वान्टीमा पहिलो हार बेहोरेको छ ।

लगातार ४ जित हात पारेको डेजर्टले सोमवार राती भएको खेलमा दुबई क्यापिटल्ससँग ६ विकेटको हार बेहोरेको हो । डेजर्टले ५ खेल खेलिसक्दा कुशलले डेब्युको अवसर पाएका छैनन् ।

१ सय ४० रनको लक्ष्य क्यापिटल्सले १७.४ ओभरमा ४ विकेट गुमाएर पूरा गर्यो । क्यापिटल्सको जितमा गुलबदिन नैबले सर्वाधिक ७८ रन जोडे ।

कप्तान सिकन्दर राजाले २४, ओपनर बेन डुकले १३ तथा नजिबुल्लाह जाद्रानले १० रन बनाए । डेजर्टका कप्तान लकि फगुर्सनले २ र मोहम्मद आमिरले १ विकेट लिए ।

त्यसअघि दुबईमा टस हारेर पहिले ब्याटिङको निम्तो पाएको डेजर्ट १९.५ ओभरमा १ सय ३९ रनमा समेटिएको थियो ।

डेजर्टका लागि एलेक्स हेल्सले सर्वाधिक ३४ रन जोडे । सरफन रादरफोर्डले २७, डान लरेन्सले २४ तथा फखर जमानले १४ रन बनाए ।

क्यापिटल्सका दुश्मन्था चमिरा र जाहिर खानले समान ३, हैदर अलि, आबेद म्याकोई, सिकन्दर राजा र गुलबदिन नैबले समान १ विकेट लिए ।

डेजर्ट ५ खेलमा ४ जित र १ हारका साथ अंक तालिकाको शीर्ष स्थानमा छ । क्यापिटल्स ५ खेलमा २ जितका साथ चौथो स्थानमा रहेको छ ।