काठमाडौं(हाम्रो खेलकुद) – बागमती प्रदेश कैलालीमा जारी प्रधानमन्त्री कप महिला राष्ट्रिय क्रिकेट प्रतियोगिताको सुपर फोरमा पुगेको छ।

मधेश प्रदेशलाई मंगलवार ७ विकेटले हराउँदै बागमतीले सुपर फोरमा स्थान बनाएको छ । बागमती समूह ‘बी’बाट सुपर फोरमा प्रवेश गर्ने दोस्रो टोली बनेको हो ।

यसअघि आजको पहिलो खेलमा कोशी प्रदेशलाई पराजित गर्दै त्रिभुवन आर्मी क्लब सुपर फोरमा प्रवेश गरिसकेको छ ।

४१ रनको झिनो लक्ष्य बागमतीले ६.४ ओभरमा ३ विकेट गुमाएर पूरा गर्यो । बागमतीका लागि यशु खड्काले सर्वाधिक १९ रन जोडिन् ।

कप्तान कन्चन श्रेष्ठ ९ रनमा आउट हुँदा विपाशा शाही ८ रनमा नट आउट रहिन् । मधेशका लागि रोजी कडारीले २ विकेट लिइन् ।

त्यसअघि धनगढीस्थित फाप्ला क्रिकेट मैदानमा टस हारेर पहिले ब्याटिङको निम्तो पाएको मधेश १५.५ ओभरमा ४० रनमा समेटियो ।

मधेशका लागि कुनै पनि ब्याटरले दोहोरो अंकमा रन जोड्न सकेनन् । कप्तान सरस्वती कुमारी र साक्षी यादवले सर्वाधिक रुपमा समान ६ रन जोडे ।

बागमतीका लागि कप्तान कन्चनले ४, विपाशा शाहीले २ तथा सोनु खड्का र मनिशा उपाध्यायले समान १ विकेट लिए ।

प्रतियोगितामा २ विभागीय र ७ प्रदेशको टोलीले प्रतिस्पर्धा गरिरहेका छन् । सहभागी टोलीलाई दुई समूहमा विभाजन गरिएको थियो ।

समूह ए मा लुम्बिनी , गण्डकी , कर्णाली , एपिएफ क्लब र सुदूरपश्चिम थिए । समूह बी मा कोशी , मधेश , बागमती, त्रिभुवन आर्मी क्लब थिए ।

दुई समूहबाट शीर्ष दुई टोली सुपर फोरमा प्रवेश गरेका छन् । समूह ‘ए’ बाट एपिएफ र सुदूरपश्चिम प्रदेश तथा समूह ‘बी’ बाट त्रिभुवन आर्मी क्लब र बागमती प्रदेश सुपर फोरमा पुगिसकेका छन् ।

सुपर फोरमा एक समूहको टोलीले अर्को समूहको टोलीसँग खेल्नेछन् ।