काठमाडौं(हाम्रो खेलकुद) – विभागीय टोली नेपाल एपिएफ क्लब अपराजित रहँदै कैलालीमा जारी प्रधानमन्त्री कप महिला राष्ट्रिय क्रिकेट प्रतियोगिताको फाइनल प्रवेश गरेको छ ।

शुक्रवार भएको सुपर फोरको खेलमा अर्को विभागीय टोली त्रिभुवन आर्मी क्लबलाई ६९ रनले पराजित गर्दै फाइनलमा पुगेको हो ।

समूह ए मा रहेको एपिएफले समूह चरणमा खेलेको सबै ४ तथा सुपर फोरको दुवै खेलमा अपराजित रहेको हो ।

हुस्सु लागेका कारण ढिला सुरु भएको खेल १७ ओभरमा छोट्याईएको थियो । एपिएफले दिएको १ सय १६ रनको लक्ष्य पछ्याएको आर्मीले निधौरित १७औं ओभरको अन्तिम बलमा ४६ रनमा अल आउट भयो ।

आर्मीका लागि राधिका पुजारले सर्वाधिक १७ रन जोडिन् । कप्तान लक्ष्मी साउदले १० रन जोड्नु बाहेक आर्मीका अन्य ब्याटरले दोहोरो अंकमा रन जोड्न सकेनन् । एपिएफका लागि रेखा रावलले ३ तथा कप्तान इन्दु बर्माले १ विकेट लिइन् ।

त्यसअघि धनगढीस्थित फाप्ला क्रिकेट मैदानमा टस हारेर पहिले ब्याटिङ गरेको एपिएफले निर्धारित १७ ओभरमा ३ विकेट गुमाएर १ सय १५ रनको योगफल तयार गरेको थियो ।

एपिएफका लागि ओपनर राजमती ऐरीले ३५ बलमा सर्वाधिक ३५ रन जोडिन् । कविता जोशीले २५ बलमा नट आउट ३४ तथा कप्तान इन्दु बर्माले १९ बलमा १८ रन जोडिन् । ममता चौधरी ११ र रोमा थापा ७ रनमा आउट भइन् ।

आर्मीका लागि सुस्मीता भुषालले २ तथा इश्वरी बिष्टले १ विकेट लिईन् । फाइनल प्रवेश गर्ने दोस्रो टोलीको भने तय भएको छैन । फाइनल पुग्ने अर्को टोलीका रुपमा आर्मी, बागमती र सुदूरपश्चिमबिचको प्रतिस्पर्धा रहेको छ ।

आजै हुने सुपर फोरको बागमती र सुदूरपश्चिमबीचको खेलबाट फाइनल पुग्ने अर्को टोलीको तय हुनेछ ।