काठमाडौं(हाम्रो खेलकुद) – सुदूरपश्चिम प्रदेश कैलालीमा जारी प्रधानमन्त्री कप महिला राष्ट्रिय क्रिकेट प्रतियोगिताको फाइनल प्रवेश गरेको छ ।

शुक्रवार भएको दिनको दोस्रो खेलमा बागमती प्रदेशलाई ३० रनले पराजित गर्दै सुदूरपश्चिम प्रदेश फाइनल प्रवेश गरेको हो । सुदूरपश्चिमले दिएको १ सय १३ रनको लक्ष्य पछ्याएको बागमती १९.४ ओभरमा ८२ रनमा समेटियो ।

बागमतीका लागि यशोदा बिष्टले सर्वाधिक ३० रन जोडिन् । ओपनर हेलिशा गुरुङले २३ रन जोड्दा अन्य ब्याटरले दोहोरो अंकमा रन बनाउँन सकेनन् । बागमतीका ६ ब्याटरले रनको खाता समेत खोल्न सकेनन् ।

सुदूरपश्चिमका लागि कविता कुवँर र करिष्मा थापाले समान २ तथा ऋतु कनौजीया र आशिका महराले समान १ विकेट लिइन् ।

त्यसअघि टस जितेर ब्याटिङ रोजेको सुदूरपश्चिमले निर्धारित २० ओभरमा ७ विकेट गुमाएर १ सय १२ रनको योगफल तयार गर्यो । सुदूरपश्चिमका लागि ऋतु कनौजीयाले नट आउट रहँदै ३४ रन जोडिन् । मनिष बोहोरा १६ तथा कविता कुवँर १३ रनमा आउट भए ।

बागमतीका लागि सोनु खड्का र मनिशा उपाध्यायले समान ३ तथा विपाशा शाहिले १ विकेट लिइन् । यससँगै महिला पिएम कपको फाइनल समिकरण पूरा भएको छ । आजै भएको पहिलो खेलमा नेपाल एपिएफ क्लबले त्रिभुवन आर्मीलाई पराजित गरि फाइनलमा स्थान बनाएको थियो ।

सुदूरपश्चिम र एपिएफबीचको फाइनल खेल शनिवार हुनेछ ।