एजेन्सी – दक्षिण अफ्रिका च्याम्पियन्स ट्रफीको सेमिफाइनलमा पुगेको छ।

रस्सी भान डर दुसेन र हेनरिक क्लासेनको सानदार साझेदारीमा कमजोर इङ्ग्ल्यान्डलाई ७ विकेटले हराउँदै दक्षिण अफ्रिका समूह विजेताका‌ रुपमा अन्तिम चारमा पुग्यो ।

पाकिस्तानको कराचीस्थित नेसनल स्टेडियममा जितको लागि १ सय ८० रनको सहज लक्ष्य दक्षिण अफ्रिकाले २९.१ ओभरमा मात्र ३ विकेटको नोक्सानीमा पूरा गर्यो।

ओपनर ट्रिस्टन स्टब्स विना कुनै रन र अर्का ओपनर रायन रिकेल्टन २७ रनमा जोफ्रा आर्चरको बलमा आउट भए। त्यतिखेर दक्षिण अफ्रिकाले ४७ रन बनाएको थियो।

त्यसपछि रस्सी भान र क्लासेनको तेस्रो विकेटका लागि १ सय २७ रनको शतकीय साझेदारी गर्दै जितको आधार खडा गरे। दुवैले अर्धशतक पूरा गरे।

रस्सी भानले सर्वाधिक अविजित ७२ रन बनाए। उनले ८७ बलको सामना गर्दै ६ चौका र ३ छक्का प्रहार गरे। हेनरिकले ११ चौकाको मद्दतमा ५६ बलबाट ६४ रन जोडे।

बलिङमा इङ्ग्ल्यान्डका जोफ्राले २ र लायम लिभिङस्टनले १ विकेट लिए। त्यसअघि टस जितेर इङ्ल्यान्डले ३८.२ ओभरमा सबै विकेट गुमाउँदै मात्र १ सय ७९ रनमा बनाएको थियो।‌

३७ रन जोड्दा ३ विकेट गुमाइसकेको इङ्ग्ल्यान्डले सुरुवात राम्रो गर्न सकेन । मार्को जानसेनले लगातार सुरुवाती ३ विकेट झारे।

फिल साल्ट ८ रनमा, जेमी स्मिथ विना कुनै रन र बेन डकेट २४ रनमा आउट भए। त्यसपछि पनि कुनै खेलाडीले ठूलो पारी खेल्न सकेनन्। जो रुटले सर्वाधिक ३७ रन जोड्दा जोफ्रा आर्चरले २५ तथा जोस बटलरले २१ रन बनाए।

बलिङमा मार्को जानसेनले ९ ओभर बलिङ गर्दै ३९ रन खर्चेर ३ विकेट लिए्। वियान मल्डरले ७ ओभर २ बल बलिङ गर्दै २५ रन दिएर ३ विकेट झारे। केशव महाराजले भने २ विकेट आफनो नाममा लेखाए।

जितले दक्षिण अफ्रिका ५ अंक सहित समुह ‘बी’ को विजेता बन्यो । यसअघि अष्ट्रेलिया र दक्षिण अफ्रिकाको खेल वास आउट भएको थियो। दक्षिण अफ्रिकाले अफगानिस्तानलाई १ सय ७ रनले हराएको थियो।

४ अंक जोड्दै सेमिफाइनल पुगिसकेको अस्ट्रेलिया समूह उप विजेता बन्यो। ३ अंक बनाएको अफगानिस्तान र अंकको खाता नखोली इङ्ग्ल्यान्ड समूह चरणबाटै बाहिरिए।‌