एजेन्सी – भारतमा जारी इण्डियन प्रिमियर लिग (आइपिएल) २०२५ को पहिलो क्वालिफायरमा स्थान बनाउँन मुम्बई इण्डियन्सले आज पञ्जाब किंग्सको सामना गर्दैछ ।

पञ्जाब र मुम्बईबीचको खेल राजस्थानको सवाइमान सिंह क्रिकेट स्टेडियममा साँझ ७ः४५ बजे सुरु हुनेछ । प्लेअफमा स्थान पक्का गरिसकेका दुवै टोलीको आजको खेलले पहिलो क्वालिफायरमा स्थान बनाउँन एक टोलीको निश्चित गर्नेछ ।

यो खेलमा पराजित हुने टोलीले भने इलिमिनेटरमा खेलका लागि स्थान पक्का गर्नेछन् । मुम्बई लिगको सुरुवाती ५ खेलमा १ मा जित हात पारेर अगाडिको यात्रा असहज बनाएको थियो । तर, पछिल्लो ८ मध्ये ७ खेलमा जित हात पारेर असहज देखिएको प्लेअफ यात्रा सहज बनाएको थियो ।

सन् २०२४ को संस्करणमा हार्दिक पाण्ड्याको कप्तानीमा मुम्बईले लिगको पुछारमा रहेको थियो। तर, यस संस्करणमा प्लेअफमा स्थान बनाएको छ । पञ्जाबले ११ वर्ष पछि प्लेअफमा स्थान बनाएको हो । २०१४ मा उपविजेता बन्नु नै पञ्जाबको उच्च नतिजा हो ।

पञ्जाब र मुम्बईबीच ३२ खेल भएको छ । जसमा १७ खेल मुम्बईले र १४ खेल पञ्जाबले जितेको छ । दुईबीचको पछिल्लो खेलमा भने मुम्बई ९ रनले विजयी भएको थियो ।

प्लेअफमा स्थान बनाउँने ४ टोलीको निश्चित भइसक्दा पहिलो क्वालिफायर र इलिमिनेट खेल्ने टोलीको टुंगो लाग्न बाँकी छ ।