एजेन्सी – अमेरिकाले विश्व कप लिग टुको खेलमा ओमानमाथि रोमाञ्चक जित हासिल गरेको छ ।

अमेरिकाको फ्लोरिडामा बुधवार बिहान भएको खेलमा अमेरिकाले ओमानलाई ९ रनले हराएको छ । २ सय ९४ रनको लक्ष्य पछ्याएको ओमानले निर्धारित ५० ओभरमा ९ विकेट गुमाएर २ सय ८४ रन मात्र बनायो ।

अन्तिम ओभरमा ओमानलाई जितका लागि १४ रन आवश्यक रहँदा अमेरिकाका बलर जसदिप सिंहले ४ रन मात्र खर्चिएका थिए । ओमानका लागि सुफ्यान मुहम्मद र हमिद मिर्जाले अर्धशतक बनाए पनि टोलीलाई जित दिलाउन सकेनन् ।

मुहम्मदले ५१ बलको सामना गर्दै ५ चौका र ३ छक्काको सहयोगमा ७२ रन जोडे । मिर्जाले ५२ बलमा ७ चौकाको सहयोगमा ५० रन बनाए ।

विनायक शुक्ला ३७ बलमा १ चौका र ३ छक्काको सहयोगमा ४६ रन थपे । कप्तान जतिन्दर सिंह ४२, मुजिबुर अलि १९, मोहम्मद नदिम १४ तथा हसनैन साह ११ रनमा आउट भए ।

अमेरिकाका जसदिप सिंह र हर्मित सिंहले समान ३ तथा सौरभ नेत्राभाल्कर र मिलान्ड कुमारले समान १ विकेट लिए ।

त्यसअघि पाहुना टोली ओमानले टस जितेर फिल्डिङ रोजेको थियो। पहिला ब्याटिङ गरेको अमेरिकाले ५० ओभरमा ८ विकेट गुमाएर २ सय ९३ रन बनायो ।

घरेलु टोलीका साईतेजा मुकामुल्लाले ७९ बलमा ५ चौका र १ छक्काको सहयोगमा सर्वाधिक ७३ रन जोडे ।

ओपनर स्मिथ पटेल ४७ बलमा ५ चौकाको सहयोगमा ४१ रन बनाए । सायन जाहाङ्गिर ३७, हर्मित सिंह ३३ तथा कप्तान मोनाक पटेल २६ रनमा आउट हुँदा संजय कृष्णमुर्ती ४० रनमा नट आउट रहे ।

ओमानका सुफ्यान मुहम्मदले ३, अमिर कलिम र सकिल अहमदले समान २ तथा समय श्रीवास्तवले १ विकेट लिए ।

जितसँगै ८ टोली सहभागी लिग टुमा अमेरिका २० खेलमा २८ अंकका साथ शीर्ष स्थानमा यथावत छ । ओमान समान खेलमा २४ अंकका साथ तेस्रो स्थानमा छ ।

लिग टु मा रहेको नेपाल अंक तालिकामा पुछारमा छ । लिग टु मा नेपालले आफ्नो चौथो राउण्ड खेल स्कटल्याण्डमा सोमवारबाट सुरु गर्नेछ ।