काठमाडौं(हाम्रो खेलकुद) – नेपाली महिला टोलीको पनि सहभागीता रहने एसीसी महिला इमर्जिङ टिम्स एसिया कपको दोस्रो संस्करण स्थगित गरिएको छ ।

एसियाली क्रिकेट परिषद्(एसिसी) ले सोमबार घोषणा गर्दै प्रतियोगिता आयोजना हुने श्रीलंकाको प्रतिकूल मौसम र स्वास्थ्य अवस्था कारण देखाउँदै प्रतियोगिता केही समयको लागि स्थगन गरेको हो । प्रतियोगिता आगामी जुन ६ देखि श्रीलंकामा सुरु हुने तय भएको थियो ।

‘यो प्रतियोगिताले एसियामा महिला क्रिकेटको भविष्यलाई आकार दिन महत्त्वपूर्ण भूमिका खेल्छ । युवा महिला क्रिकेटरहरूलाई सुरक्षित र प्रतिस्पर्धात्मक प्लेटफर्म विकास गर्न सुनिश्चित गर्न हाम्रो प्रतिबद्धता छ,’ एसीसीका अध्यक्ष मोहसिन नक्वीले एक विज्ञप्तिमा भने।

एसीसीले नयाँ तालिका चाँडै नै सार्वजनिक गरिने बताएको छ । पहिलो संस्करणको प्रतियोगिता २०२३ मा हङकङमा आयोजना भएको थियो । जसमा भारत ‘ए’ ले फाइनलमा बंगलादेश ‘ए’ लाई ३१ रनले हराउँदै च्याम्पियन बनेको थियो ।

पहिलो संस्करणमा भारत ‘ए’, बंगलादेश ‘ए’, पाकिस्तान ‘ए’, श्रीलंका ‘ए’, संयुक्त अरब इमिरेट्स, नेपाल, आयोजक हङकङ र मलेसियाको सहभागिता थियो।