काठमाडौं(हाम्रो खेलकुद) – रौनक श्रीवास्तवको दोहोरो शतकको सहयोगमा लुम्बिनी प्रदेशले टि बी साह यु १६ राष्ट्रिय क्रिकेट प्रतियोगितामा विजयी सुरुवात गरेको छ ।

मंगलबार भएको आफ्नो पहिलो खेलमा लुम्बिनीले गण्डकी प्रदेशमाथि ३ सय ३२ रनको फराकिलो जित हासिल गरेको हो । ४ सय ४ रनको विशाल लक्ष्य पछ्याएको गण्डकी २८.२ ओभरमा ७१ रनमा समेटियो ।

गण्डकीका लागि अनिश राउत ६३ बलमा अविजित २२ रनमा आउट भए । प्रतिक रावलले १४ रन जोड्दा अन्य ब्याटरले भने दोहोरो अंकमा रन जोड्न सकेनन् । गण्डकीका ५ ब्याटरले रनको खाता नै खोल्न सकेनन् ।

लुम्बिनीका लागि शुभम खनाले ८ ओभरमा ९ रन खर्चिएर ५ विकेट लिए । पहिलो इनिङमा दोहोरो शतक बनाएका रौनकले २ लक्ष्मण कुमाल र शोयब हसनले समान १ विकेट लिए ।

त्यसअघि सुर्खेतमा टस जितेर ब्याटिङ रोजेको लुम्बिनीले ४५.४ ओभरमा अल आउट हुदै ४ सय ३ रनको वलियो योगफल तयार गरेको हो । लुम्बिनीका लागि रौनकले दोहोरो शतक बनाए । उनले १ सय १७ बलमा १६ चौका र १६ छक्काको सहयोगमा २ सय १७ जोडे ।

लक्ष्मण कुमाल ७३ बलमा ६ चौकाको सहयोगमा ६० रनमा आउट भए । आरिफ खान २५, शुभम खनाल र कप्तान समिर अलि समान १७ रनमा आउट हुँदा चन्द्र थापा १० रनमा अविजित रहे ।

गण्डकीका लागि करण गैरेले ३, राज परियारले २ तथा अनिश राउत, सैलेश काफ्ले, कप्तान सुप्रिम सुनार, सुजन अर्याल र रिदम पाण्डेले समान १ विकेट लिए ।

पहिलो खेलमै जित निकालेको लुम्बिनी २ अंकका साथ शीर्ष स्थानमा उक्लिएको छ । पहिलो खेल हारबाट सुरुवात गरेको गण्डकी अंक बिहिन रहेको छ ।

सिंगल राउन्ड रोविनमा हुने प्रतियोगितामा सात प्रदेश सहभागी हुनेछन् । लिग चरणको खेलमा शीर्ष दुई टोलीले फाइनल खेल्नेछन् । फाइनल जेठ ३१ गते हुनेछ ।

यस प्रतियोगिता एसिसी मेन्स यु १६ इष्ट जोन कप २०२५ का लागि छनोटका रुपमा समेत रहेको छ ।