काठमाडौं(हाम्रो खेलकुद) – सुशील रावलको ५ विकेट सहयोगमा सुदूरपश्चिम प्रदेशले टिबी साह मेमोरियल यु-१६ क्रिकेट प्रतियोगितामा पहिलो जित हात पारेको छ ।

तेस्रो खेलमा पहिलो जित हासिल गर्ने क्रममा शुक्रवार सुदूरपश्चिमले मधेश प्रदेशलाई ८ विकेटले पराजित गर्यो । मधेशले दिएको ८७ रनको लक्ष्य सुदूरपश्चिमले १३ ओभरमा २ विकेट गुमाएर पूरा गर्यो ।

सुदूरपश्चिमको जितमा विक्रम बोहोरा ३१ बलमा ४ चौका २ छक्काको सहयोगमा सर्वाधिक ४३ रनमा आउट भए । आयुष चन्दले ४६ बलमा ६ चौकाको सहयोगमा ३४ रन जोडे । रविन भण्डारी ४ रनमा अविजित रहे ।

मधेशका लागि नुमैर अहमद र शेख अम्रानले समान १ विकेट लिए । त्यसअघि विरेन्द्रनगर क्रिकेट मैदानमा टस हारेर ब्याटिङको निम्तो पाएको मधेशले १८.१ ओभरमा ८६ रनमा अल आउट भयो ।

मधेशका लागि राजिभ कुमार सदाले १६ बलमा ३ चौकाको सहयोगमा अविजित २० रन जोडे । कप्तान परिमर्जन यादव ११ तथा नुमैर १० रनमा आउट भए । सुदूरपश्चिमका लागि सुसिलले ७ ओभरमा ३४ रन खर्चिएर ५ विकेट लिए ।

कप्तान सचिन भट्टले ३ तथा रितेश बिष्टले २ विकेट लिए । पहिलो २ खेलमा पराजित सुदूरपश्चिम २ अंकमा रहेको छ । पहिलो २ खेल जितेको मधेश ४ अंकमा रहेको छ ।

सिंगल राउन्ड रोविनमा हुने प्रतियोगितामा ७ प्रदेश सहभागी छ । शीर्ष दुई टोलीले जेठ ३१ गते फाइनल खेल्नेछन् ।

यो प्रतियोगिता एसिसी मेन्स यु १६ इष्ट जोन कप २०२५ का लागि छनोटका रुपमा समेत रहेको छ ।