काठमाडौं(हाम्रो खेलकुद) – बागमती प्रदेशले टिबी साह यु-१६ राष्ट्रिय क्रिकेट प्रतियोगितामा दोस्रो जित हासिल गरेको छ ।

बागमतीले शनिवार मधेश प्रदेशलाई ३७ रनको अन्तरले पराजित गर्यो । २ सय ४९ रनको लक्ष्य पछ्याएको मधेश ३६.४ ओभरमा २ सय ११ रनमा समेटियो ।

मधेशका लागि प्रमञ्जन यादवले २६ बलमा सर्वाधिक ३५ रन जोडे । आयन मुखिया ३३, सुशान्त सिंह १६, रुपेश यादव १८, शेख अम्रानले १६ तथा सलमान अलि १३ रनमा आउट भए ।

बागमतीका लागि कप्तान प्रसिद्ध जैशी, रोहित ठाकुर, सुसिल साउद तथा शिवशक्ति महतोले समान २ तथा राजेश बोहोराले १ विकेट लिए ।

विरेन्द्रनगर क्रिकेट मैदान सुर्खेतमा त्यसअघि टस जितेर ब्याटिङ रोजेको बागमती ४६.५ ओभरमा २ सय ४८ रन बनायो ।

बागमतीका आशिष गुप्ता ७८ बलमा ५ चौकाको सहयोगमा ५३ रन बनाए । ओपनर सुर्याशुं कोइरालाले ३० बलमा ६ चौका र ३ छक्काको सहयोगमा ४९ रन जोडे। राजेश बोहोराले ५१ बलमा ३ चौका र १ छक्काको सहयोगमा ४६ रन जोडे ।

शिवशक्ति महतो ४६ बलमा ३ चौकाको सहयोगमा २२ रनमा आउट भए । कप्तान प्रसिद्ध जैशी र जोय थापाले समान १२ रनमा आउट भए ।

अभय यादवले ८.५ ओभरमा ४२ रनमा खर्चिएर ५ विकेट लिए । रोहन यादवले २ तथा नुमेरु अहमद, शेख अम्रान र राजिवकुमार सदाले समान १ विकेट लिए ।

बागमती ३ खेलमा २ जितका साथ तेस्रो स्थानमा छ । सिंगल राउन्ड रोविनमा हुने प्रतियोगितामा ७ प्रदेश सहभागी छन् । शीर्ष दुई टोलीले जेठ ३१ गते फाइनल खेल्नेछन् ।

यो प्रतियोगिता एसिसी मेन्स यु १६ इष्ट जोन कप २०२५ का लागि छनोटका रुपमा समेत रहेको छ ।