काठमाडौं (हाम्रो खेलकुद)- नेपाल महिला क्रिकेट टोलीकी पूर्व कप्तान एवम् सदस्य रुविना क्षेत्री हिमा एयुएस एजुकेसन कन्सल्टेन्सीको ब्रान्ड एम्बेसडर नियुक्त भएकी छिन्।

डेढ दशक भन्दा लामो क्रिकेट खेल जीवनामा रुविनाको पहिलो पटक कुनै ब्रान्डको एम्बेसडर नियुक्त भएकी हुन्।

रुविनाले कालिकास्थानस्थित कन्सल्टेन्सीमा मंगलवार सम्झौता पत्रमा हस्ताक्षर गरेको बताइएको छ कन्सल्टेन्सीले रुविनासँग सहकार्य गर्न पाउनु गौरवको विषय भएको बताएको छ।

उनले ब्रान्ड एम्बेसडरको रूपमा जोडिन पाउँदा उत्साहित भएको‌ बताएकी छिन् । सामाजिक सन्जालमा रुविनाले लेखेकी छिन्,’ म यो अवसर उपलब्ध गराएकोमा क्रिकेट संघ नेपाल (क्यान) लाई धन्यवाद दिन चाहन्छु। विशेष धन्यवाद र सम्मान प्रकट गर्न चाहन्छु विनोद कुँवर रोशन कुमार सिंह र हिमाकी नेपाल प्रमुख पूजा म्याम लाई । जसले महिला क्रिकेटरलाई ब्रान्ड एम्बेसडर बनाउने सकारात्मक निर्णयमा पुग्न आवश्यक छलफल गर्नुभयो र समर्थन गर्नुभयो।’

म विश्वस्त छु कि यसले महिला क्रिकेटको विकासमा महत्वपूर्ण भूमिका खेल्नेछ र ममा अझ कडा मेहनत गर्ने आत्मविश्वास दिनेछ, रुविनाले अगाडि भनेकी छिन्,’म खेलकुद र शिक्षाको माध्यमबाट विश्वभरिका युवालाई प्रेरित र सशक्त पार्ने साझा अभियानमा सहकार्य गर्न प्रतीक्षा गरिरहेकी छु।’

गत महिना नेपाली महिला टोलीले एसिया टि ट्वान्टी महिला विश्वकप छनोट पार गर्दै ग्लोबल छनोटमा पुग्दा उनी टोलीको महत्वपूर्ण सदस्य थिइन् ।