एजेन्सी – बंगलादेशले ५ रन जोड्दा ७ विकेट गुमाएपछि घरेलु टोली श्रीलंकासँगको पहिलो ओडिआई खेलमा हार बेहोरेको छ ।

१ सय रनमा १ विकेट गुमाएको बंगलादेशले थप ५ रन जोड्दा ७ विकेट गुमाएपछि आज श्रीलंकासँग ७७ रनले पराजित भएको हो ।

३ ओडिआई सिरिजमा श्रीलंकाले १-० को अग्रता बनाएको छ । २ सय ४५ रनको लक्ष्य पछ्याएको बंगलादेश ३५.५ ओभरमा १ सय ६७ रनमा अल आउट भयो ।

बंगलादेशका तान्जिद हसनले ६१ बलमा सर्वाधिक ६२ रन जोडे । जाकिर अलि ६४ बलमा ४ चौका र ४ छक्कासहित ५१ रन बनाए । नजमु हुसैन शान्तो २३ रनमा आउट भए ।

श्रीलंकाका वानिन्दु हसरंगाले ४, कमिन्डु मेन्डिसले ३ तथा आसिथा फर्नान्डो र महेश थिक्सेनाले समान १ विकेट लिए ।

त्यसअघि आर प्रेमदासा क्रिकेट स्टेडियम कोलम्बोमा टस जितेर पहिले ब्याटिङ गरेको श्रीलंका ४९.२ ओभरमा २ सय ४४ रनमा अल आउट भयो ।

श्रीलंकाका कप्तान चरिथ असलंकाले १ सय २३ बलमा ६ चौका तथा ४ छक्काको सहयोगमा १ सय ६ रनको शतकीय इनिङ खेले ।

कुशल मेन्डिसले ४३ बलमा ६ चौका तथा १ छक्काको सहयोगमा ४५ रन जोडे । मिलन रत्नायके तथा वानिन्दु हसरंगा समान २२ रनमा आउट भए ।

बंगलादेशका तस्किन अहमदले ४, तान्जिम हसन साकिबले ३ तथा तनविर इस्लाम र नजमुल हुसैन शान्तोले समान १ विकेट लिए । दोस्रो ओडिआई खेल शनिवार हुनेछ ।