एजेन्सी – भारतविरुद्ध जितको लागि विशाल लक्ष्य पछ्याएको घरेलु टोली इङ्ग्ल्याण्डले दोस्रो टेस्टको दोस्रो इनिङमा खराब सुरुवात गरेको छ ।

एजबास्टनमा जितका लागि ६ सय ८ रन विशाल लक्ष्य पाएको इङ्ग्ल्यान्डले चौथो दिन शनिवारको खेल सकिदा ७२ रन जोड्दा ३ विकेट गुमाएको छ ।

पाँचौ दिनको खेल बाँकी रहँदा घरेलु टोलीले ५ सय ३५ रनले पछि छ । भारतलाई जितको लागि बाँकी ७ विकेट लिन सक्नु पर्ने ।

घरेलु टोलीका ओली पोप २४ र ह्यारी ब्रुक १५ रनमा क्रिजमा छन् । त्यसअघि बेन डकेट २५, जो रुट ६ तथा ज्याक क्रली रनको खाता नखोल्दै आउट भए ।

पहिलो इनिङमा भारतले १ सय ८० रनको अग्रता लिएको थियो। दोस्रो इनिङमा ६ विकेटको नोक्सानीमा ४ सय २७ रन बनाउँदै इनिङ समाप्तिको घोषणा गर्दा भारतले ६ सय ७ रन अग्रता लिएको थियो।

दोस्रो इनिङमा कप्तान शुभमन गिलले १ सय ६१ रनको शतकीय इनिङ खेले । गिलले पहिलो इनिङमा सानदार दोहोरो शतकीय इनिङ खेलेका थिए ।

ओपनर केएल राहुल, ऋषभ पन्त र रविन्द्र जडेजाले अर्धशतक बनाए । राहुलले ५५ र पन्तले ६५ रन जोडे। जडेजा ६९ रनमा अविजित रहे । यशस्वी जैसवाल २८ र करुण नायर २६ रनमा आउट भए ।

इङ्ग्ल्यान्डका जोस टंग र सोयब बसिरले समान २ तथा बायडेन कार्स र जो रुटले समान १ विकेट लिए ।

त्यसअघि टस हारेर पहिले ब्याटिङ गरेको भारतले पहिलो इनिङमा ५ सय ८७ रन जोडेको थियो । इङ्ग्ल्यान्डले पहिलो इनिङमा ४ सय ७ रन बनाएको थियो। ५ टेस्ट सिरिजमा घरेलु टोली १-० ले अघि छ ।