सुमन अधिकारी, बुटवल

मलेसियाबाट एसिसी यु १६ स्टन जोन क्रिकेट कप जितेर फर्केको नेपाली युवा टोलीका सदस्य रौनक श्रीवास्तवलाई गृह जिल्ला कपिलवस्तुमा भव्य स्वागतसहित सम्मान गरिएको छ ।

रौनकलाई जिल्ला क्रिकेट संघ कपिलवस्तुको अगुवाईमा बाजागाजासहित तौलिहवा बजार परिक्रमा गराई स्वागत र सम्मान गरिएको थियो ।

र्यालीसहित बजार परिक्रमा पछि आयोजित कार्यक्रममा प्रदेश सभासद सुधाकर पाण्डेय, कपिलवस्तु नगरपालिकाका मेयर सुदीप पौडेल, प्रजिअ दिल कुमार तामाङ, क्रिकेट संघका जिल्ला अध्यक्ष प्रकाश गैरे लगायतले सम्मान गरेका थिए ।

त्यस अवसरमा मेयर सुदीप पौडेलले ५१ हजार रुपैयाँ, वडा नम्बर ३ का अध्यक्ष समेत रहेका क्रिकेट संघका जिल्ला अध्यक्ष प्रकाश गैरेले २५ हजार मुल्यको क्रिकेट ब्याट तथा संघको तर्फबाट ११ हजार रुपैयाँ रौनकलाई प्रदान गरे ।

रौनकका गुरु भारतमा रहेको एकेडेमीका मालिक बिवेक त्रिपाठीले रौनकको क्रिकेटमा राम्रो भबिष्य देखेको बताउँदै उसलाई थप प्रशिक्षणको अवश्यक रहेको बताए ।

नेपाल क्रिकेट संघका पूर्व केन्द्रिय सचिव प्रशान्तबिक्रम मल्लले रौनक क्रिकेटको हिरा भएको भन्दै थप प्रशिक्षणकालागि आफूले पहल गर्ने प्रतिबद्धता जनाएका थिए । रौनकलाई शिवराज नगरपालिकाले चन्द्रौटामा स्वागत र सम्मान गरेको थियो ।

त्यस अवसरमा बोल्दै रौनकले आफुले यो सफलता प्राप्त गर्न अभिभावक र गुरुहरुको लगानी तथा क्रिकेट संघको सहयोग रहेको बताएका थिए ।

रौनकले प्रतियोगिताको एकै इनिङमा १ सय ६८ रन बनाएक थिए । उनी प्रतियोगितामा सर्वोत्कृष्ट खेलाडी र उत्कृष्ट ब्याटार घोषित भएका थिए ।