एजेन्सी – कुशल मेन्डिसको शतक सहयोगमा श्रीलंकाले पाहुना टोली बंगलादेशविरुद्धको ओडिआई सिरिज जितेको छ ।

तेस्रो तथा निर्णायक ओडिआईमा ९९ रनको जित निकाल्दै श्रीलंकाले सिरिज २-१ ले आफ्नो पक्षमा पार्यो । पहिलो ओडिआई श्रीलंकाले ७७ रनले र दोस्रो बंगलादेशले १६ रनले जितेको थियो ।

२ सय ८६ रनको लक्ष्य पछ्याएको बंगलादेश ३९.४ ओभरमा १ सय ८६ रनमा अल आउट भयो ।बंगलादेशका तौहिद हृदयले ७८ बलमा ४ चौका र १ छक्काको सहयोगमा सर्वाधिक ५१ रन जोडे ।

प्रभेज हौसन र मेहेदी हसन मिराज समान २८, जाकिर अलि २७, तान्जिद हसन १७ तथा शमिम हौसन १२ रनमा आउट भए ।

श्रीलंकाका दुस्मथा चमिरा र आसिथा फर्नान्डोले समान ३ तथा दुनिथ बिल्लालागे र वानिन्दु हसरंगाले समान २ विकेट लिए ।

त्यसअघि पाल्लिखेले अन्तर्राष्ट्रिय क्रिकेट स्टेडियममा टस जितेर ब्याटिङ गरेको श्रीलंकाले निर्धारित ५० ओभरमा ७ विकेट गुमाएर २ सय ८५ रनको योगफल तयार गरेको थियो ।

श्रीलंकाका लागि कुशलले १ सय १४ बलमा १८ चौकाको सहयोगमा १ सय २४ रनको शतकीय इनिङ खेले । कप्तान चरिथ असलंका ६८ बलमा ९ चौकाको सहयोगमा ५८ रन बनाए।

ओपनर पथुम निशंका ३५, कमिन्डु मेन्डिस १६ तथा जानिथ लियान्गा १२ रनमा आउट भए । बंगलादेशका लागि कप्तान मेहेदी हसन मिराज र तस्किन अहमदले समान २ तथा तान्जिम हसन साकिब, तन्भिर इस्लाम र शमिम होसैनले समान १ विकेट लिए ।

यी दुई टोलीबीचको २ टेस्टकल सिरिजमा श्रीलंका १-० ले जितेको थियो । अब ३ टि ट्वान्टी आई सिरिज बिहीवार सुरु हुनेछ ।