एजेन्सी – युरोपेली देश इटालीले पहिलो पटक टि ट्वान्टी विश्व कपमा छनोट भएको छ।

युरोपेली क्षेत्रीय छनोटको शुक्रवार भएको अन्तिम खेलमा नेदरल्याण्ड्ससँग ९ विकेटले पराजित भए रन रेटमा जर्सीलाई पछि पारेर इटाली पहिलो पटक विश्व कप पुग्न सफल भएको हो ।

इटालीलाई पराजित गरेको नेदरल्याण्ड्सले पनि विश्वकपमा स्थान पक्का गरेको छ ।

युरोपेली क्षेत्रीय छनोटमा ५ राष्ट्रको सहभागिता रहेको थियो । सिंगल राउन्डमा भएको प्रतियोगिताको शीर्ष २ देशले विश्वकपमा स्थान बनाएका हुन् ।

नियमित दाबेदार स्कटल्याण्ड भने इटाली र जर्सीसँगको हारपछि छनोटबाट बाहिरिएको हो ।

इटाली र नेदरल्याण्ड्सको छनोटसँगै आगामी वर्ष भारत र श्रीलंकामा आयोजना हुने टि ट्वान्टी विश्वकपमा १५ देशको छनोट भइसकेको छ । टि ट्वान्टी विश्वकपमा २० टोलीको सहभागिता रहने छ ।

विश्वकपमा छनोट यसप्रकार भएको छ :

आयोजक (भारत र श्रीलंका) – २

सन् २०२४ को टि ट्वान्टी विश्वकपको सुपर ८ मा पुगेका ७ राष्ट्र ( ८ मध्येको १ राष्ट्र भारत आयोजकका रुपमा छनोट भईसकेकोले ७ टोलीमा अफगानिस्तान, अस्ट्रेलिया, दक्षिण अफ्रिका, बंगलादेश, इङ्ग्ल्याण्ड, अमेरिका, वेस्ट इण्डिज) – ७

३० जुन २०२४ सम्मको टि ट्वान्टी वरीयताका आधारमा (न्युजिल्याण्ड, पाकिस्तान र आयरल्याण्ड) – ३

अमेरिका क्षेत्रीय छनोट क्यानडा – १

युरोप क्षेत्रीय छनोट (इटाली र नेदरल्याण्ड्स) – २

अफ्रिका छनोट २१ सेप्टेम्बरबाट सुरु हुने यसबाट २ मुलुक छनोट हुनेछन् । नेपालसमेत सहभागी रहने एसियाली तथा पुर्वी एसियाली छनोट ८ अक्टोबरबाट सुरु भई ३ टोली छनोट हुनेछ ।