काठमाडौं (हाम्रो खेलकुद) – राजविराजमा जारी सप्तरी प्राइड लिगको चौंथो दिन आइतवार कञ्चनरुप राइनोज र रोयल च्यालेन्जर्स बाह्री वीरपुर विजयी भएका छन्।

पहिलो खेलमा राइनोजले राजपुर वारियरलाई ५ विकेटले पराजित गर्यो । १ सय २५ रनको लक्ष्य राइनोजले १६ ओभरमा ५ विकेट गुमाएर भेटायो।

राइनोजका ओपनर राकेश कामतले अर्धशतक बनाए। राकेशले २५ बलमा ८ चौका र तीन छक्का मद्दतले ५४ रन जोडे । यस्तै रासिद खानले ३० बलमा ३१ रनमा आउट बनाए। रोनक सिंहले २४ बलमा अविजित रहँदै १७ रन जोडे ।

राजगढ वारियरका बलर बिक्की पासवान र रोशन यादवले समान २ विकेट लिए।

त्यसअघि टस जितेर ब्याटिङ गरेको वारियर्सले २० ओभरमा ९ विकेट गुमाएर १ सय २४ रन बनाएको थियो ।

वारियर्सका नयन यादवले सर्वाधिक ३३ रन, रोशन यादवले ३२ रन बनाए । अजित यादवले १५ र मनिष यादवले अविजित १४ रन जोडे।

राइनोजको बलिङतर्फ राशिद खान, उमेश चौधरी र अभिमन्यु सरदारले समान २ विकेट लिए । मुकेश सिंहको नाममा १ विकेट रह्यो । विजयी टोलीका राकेश कामत प्लेयर अफ दि म्याच घोषित भए।

आजको दोस्रो खेलमा रोयल च्यालेन्जर्स बाह्री वीरपुरले रुपनि राइडर्सलाई २८ रनले पराजित गर्यो। १ सय ३४ रनको लक्ष्य पछ्याउने क्रममा राइडर्सले १८.१ ओभरमा १ सय ५ रनमा सबै विकेट गुमायो ।

राइडर्सको ब्याटिङमा गौरभ शाहले सर्वाधिक ३२ रन बनाए । सुमन चौधरीले १७ र विशाल पटेलले १३ रन जोडे ।

वीरपुरको बलिङमा तृत राज दास, सुमित श्रेष्ठ र राहुल विकले समान ३ विकेट लिए ।

त्यसअघि टस जितेर ब्याटिङ गरेको वीरपुरले निर्धारित २० ओभरमा ८ विकेट गुमाएर १ सय ३३ रन बनाएको थियो।

वीरपुरको लागि ओपनर अमित यादवले सर्वाधिक ३३ रन बनाए । यस्तै अमित मण्डलले १३, विकास दासले १२, भीम यादवले ११ र सुमित श्रेष्ठले १० रन जोडे।

रुपनी राइडर्सको बलिङमा अशोक मेहताले सर्वाधिक ३ विकेट लिए। इमरान शेख र रविन मण्डलले समान २ विकेट लिए । विजयी टोलीका सुमित श्रेष्ठ प्लेयर अफ दि म्याच भए।

८ दिन संचालन हुने प्रतियोगितामा ८ टोलीको सहभागिता छ । सहभागी टोलीलाई दुई समूहमा विभाजन गरिएको छ। समुह ‘ए’ मा हनुमाननगर हिरोज, कन्चनरुप राइनोज, राजगढ वारियर्स, राजविराज राजदेवी रोयल रहेका छन् ।

समूह ‘बि’ मा तिराहुट टाइगर्स, रोयल च्यालेन्जर बाराही विरपुर, रुपनी राइडर्स तथा खडक वारियर्स रहेका छन्।

समूह चरणमा सबै टिमले एकअर्का संग खेलेपछि समूहका शीर्ष २ टोली सेमिफाइनल पुग्नेछन् । फाइनल साउन १ गते हुनेछ।

प्रतियोगिताको विजेता टोलीले २ लाख र दोस्रो टोलीले १ लाख रुपैयाँ प्राप्त गर्नेछ।