एजेन्सी – एमआई न्युयोर्क अमेरिकामा आयोजना हुने मेजर लिग क्रिकेटमा दोस्रो पटक च्याम्पियन भएको छ ।

सोमबार बिहान सम्पन्न फाइनल खेलमा वासिङ्टगन फ्रिडमलाई ५ रनले पराजित गर्दै न्युयोर्क दोस्रो पटक च्याम्पियन बनेको हो । १ सय ८१ रनको लक्ष्य पछ्याएको वासिङ्टगनले निर्धारित २० ओभरमा ५ विकेट गुमाएर १ सय ७५ रन मात्र बनाउन सक्यो ।

वासिंटनका लागि ओपनर रचिन रविन्द्रले आफ्नो टि ट्वान्टी करियरकै उत्कृष्ट ब्याटिङ गरे पनि जित दिलाउन सकेनन् । रविन्द्रले ४१ बलमा ८ चौका र २ छक्काको सहयोगमा सर्वाधिक ७० रनको इनिङ खेले ।

प्रतियोगिताको पहिलो संस्करणमा न्युयोर्क च्याम्पियन भएको थियो । दोस्रो संस्करणमा भने वासिङ्टगन च्याम्पियन भएको थियो । वासिङ्टगनले पहिलो ओभरमा नै २ विकेट गुमाएको थियो ।

दोस्रो विकेटका लागि रविन्द्र र ज्याक एडवार्डसले ८४ रनको साझेदारी गरेका थिए । एडवार्ड ३३ रन बनाउँदै आउट भएका थिए । ग्लेन फिलिप्स ३४ बलमा ५ छक्काको सहयोगमा ४८ रनमा अविजित रहे । कप्तान ग्लेन म्याक्सवेल १५ रनमा आउट भए ।

न्युयोर्कका लागि रुशिल उगारकर र ट्रेन्ट बोल्टले समान २ तथा नोस्तुश केन्जिकेले १ विकेट लिए ।

त्यसअघि डालासमा रहेको ग्रान्ड प्रेरी स्टेडियममा टस हारेर पहिले ब्याटिङ गरेको न्युयोर्कले निर्धारित २० ओभरमा ७ विकेट गुमाएर १ सय ८० रनको योगफल तयार गरेको थियो । न्युयोर्कका लागि ओपनर क्विटन डि ककले अर्धशतक बनाएका थिए ।

डि ककले ४६ बलमा ६ चौका र ४ छक्काको सहयोगमा सर्वाधिक ७७ रन जोडेका थिए । अर्का ओपनर मोनाक पटेल २२ बलमा २ चौका र १ छक्काको सहयोगमा २८ रनमा आउट भए । कुनवार जित सिंह २२ रनमा अविजित रहे ।

कप्तान निकोलस पुरन २१ तथा तेजेन्द्र सिंह १४ रनमा आउट भए । वासिङ्टगनका लागि लकि फर्गुसनले ३ तथा इयान होल्यान्ड, ग्लेन म्याक्सवेल, ज्याक एडवार्ड्स र सौरभ नेत्राभाल्करले समान १ विकेट लिए ।