एजेन्सी – घरेलु टोली इङ्ग्ल्याण्डले सोमवार भारतलाई तेस्रो टेस्टमा २२ रनले पराजित गरेको छ ।

लड्स क्रिकेट स्टेडियममा १ सय ९३ रनको लक्ष्य पछ्याएको भारत १ सय ७० रन अलआउट भयो। योसँगै इङ्ग्ल्याण्डले ५ टेस्ट सिरिजमा २-१ को अग्रता लिएको छ ।

जितका लागि पाँचौं दिन भारतलाई १ सय ३५ र इङ्ग्ल्याण्डलाई ६ विकेटको आवश्यकता थियो । इङ्ग्ल्याण्डले पाँचौ दिनको अन्तिम सेसनमा आवश्यक ६ विकेट पूरा गरेपछि खेल जितेको हो ।

दिनको पहिलो सेसनमा नै आवश्यक ६ मध्ये ४ विकेट लिइ सकेको इङ्ग्ल्याण्डलाई पछिल्लो दुई विकेट लिन अन्तिम सेसनसम्म कुर्नु परेको थियो ।

दोस्रो इनिङमा भारतका लागि रविन्द्र जडेजाले अर्धशतकीय इनिङ खेले पनि टोलीलाई जित दिलाउन भने सकेनन् । जडेजा ६१ रनमा अविजित रहे ।

केएल राहुल ३९, करुण नायर १४ तथा नितिशकुमार रेड्डी १३ रनमा आउट भए ।

इङ्ग्ल्याण्डका लागि जोफ्रा आर्चर र कप्तान बेन स्टोक्सले समान ३, बाइडेन कार्सले २ तथा क्रिस वोक्स र शोयब बसिरले समान १ विकेट लिए ।

पहिलो इनिङ बराबरीमा सकिएपछि इङ्ग्ल्याडले दोस्रो इनिङमा १ सय ९२ रन मात्र जोड्न सकेको थियो । दोस्रो इनिङमा जो रुट सर्वाधिक ४० रन बनाए । कप्तान बेन स्टोक्स ३३, ह्यारी ब्रुक २३ तथा ज्याक क्रली २२ रनमा आउट भए ।

इङ्ग्ल्याण्डलाई कम रनमा नै रोक्न भारतका वासिंटन सुन्दरले ४, मोहम्मद सिराज र जसप्रित बुमराहले समान २ तथा आकाश दिप र नितिशकुमार रेड्डीले समान १ विकेट लिए ।

तेस्रो टेस्टको पहिलो इनिङमा दुबै टोलीले समान ३ सय ८७ रनमा अल आउट भएको हो ।

चौथो टेस्ट खेल २३ जुलाई (साउन ७) मा सुरु हुनेछ । पहिलो टेस्टमा इङ्ग्ल्याण्ड र दोस्रोमा भारत विजयी भएको थियो।