काठमाडौं (हाम्रो खेलकुद) – सातौं मेयर कप सप्तरी प्राइड लिग (एसपिएल) को सेमिफाइनल समीकरण पूरा भएको छ।

सप्तरीको राजविराजमा जारी एसपिएलको मंगलवारको नतिजापछि सेमिफाइनल समीकरण पूरा भएको छ। आजको खेल जित्दै कन्चनरुप राइनोज समूह ‘ए’ को तथा खडक वारियर्स समूह ‘बी’ को उपविजेताको रुपमा अन्तिम चारमा पुगेका हुन्।

पबी स्कुलमा भएको पहिलो खेलमा हनुमाननगर हिरोजलाई ४ विकेटले पराजित गर्दै राइनोज सेमिफाइनल पुगेको हो। ३८ रनको सामान्य लक्ष्य राइनोजले ८.४ ओभरमा ६ विकेट गुमाएर भेटायो।

राइनोजका महानन्द यादवले २ चौका र १ छक्कामा सर्वाधिक १४ रन बनाए । राकेश कामतले ८, रौनक सिंहले ६ तथा रिराज साहले ५ रन जोडे।

हिरोजकोका सन्जन बैठाले सर्वाधिक ३, गोमानन्द अमात्यले २ र सन्जिब मण्डलले १ विकेट लिए।

त्यसअघि टस जितेर ब्याटिङ गरेको हनुमाननगर हिरोजले १०.३ ओभरमा सबै विकेट गुमाएर ३७ रन बनायो।

राइनोजका बलर शम्भु मण्डल र अभिमन्यु सरदारले समान ४ विकेट लिए। प्लेयर अफ द म्याच घोषित शम्भुले ४ ओभरमा २२ रन खर्चिए । मुकेश सिंहले २ विकेट लिए।

दोस्रो खेलमा खडक वारियर्सले रोयल च्यालेन्जर्स बाह्री वीरपुरलाई ८ विकेटले हरायो। १ सय २२ रनको लक्ष्य वारियर्सले मात्र २ विकेट गुमाएर १६ ओभरमा भेटायो।

वारियर्सका सन्तोष कार्कीले ४० बलमा ५ चौका र ४ छक्कासहित नटआउट ६३ रन बनाए। यस्तै ओपनर फिर्दोश अन्सारीले अविजित ४३ रन जोडे ।

सन्तोष र फिर्दोशले तेश्रो विकेटको लागि ९२ रनको साझेदारी गर्दै टोलीलाई जितसम्म डोर्याए। वीरपुरका राहुल विकले १ मात्र विकेट लिए।

त्यसअघि टस जितेर ब्याटिङ गरेको वीरपुरले २० ओभरमा ८ विकेट गुमाएर १ सय २१ रन बनायो।

वीरपुरका भिम यादवले सर्वाधिक २५ रन बनाए। यस्तै तृत राज दासले २२, राहुल विकले १५ तथा अमित यादवले १४ रन जोडे।

खडक वारियर्सका बलर फिर्दोश अन्सारी, अभिषेक कार्की र अनिल कुमार यादवले समान २ विकेट लिए। पप्पु यादव (बी) र पप्पु यादव (ए) ले समान १ विकेट लिए।

अलराउण्ड प्रदर्शन गरेका फिर्दोश अन्सारी प्लेयर अफ द म्याच भए। सप्तरी क्रिकेट संघद्वारा आयोजित प्रतियोगिताको विजेता टोलीले २ लाख र दोस्रो टोलीले १ लाख रुपैयाँ प्राप्त गर्नेछ।

यस अघि समूह ‘ए’ को विजेताको रुपमा राजविराज राजदेवी रोयल र समुह ‘बी’ को विजेताको रुपमा तिरहुट टाइगर्स सेमिफाइनल पुगिसकेका छन्।
दुवै सेमिफाइनल बुधवार हुनेछ। फाइनल बिहीवार हुनेछ।खेल हुनेछन् ।