काठमाडौं (हाम्रो खेलकुद) – नेपाल प्रिमियर लिग (एनपीएल) को टोली सुदूरपश्चिम रोयल्सले धनगढीस्थित एसपिए कलेजसँगको सम्झौता नवीकरण गरेको छ ।

एसपिएका प्रबन्ध निर्देशक सुवास शाही र सुदूरपश्चिमका प्रमुख कार्यकारी अधिकृत (सिइओ) प्रकाश खड्काले बिहिवार सम्झौतामा हस्ताक्षर गरे ।

एसपिएले नेपालमा क्यान निलम्बनमा रहँदा फ्रेन्चाइज लिगको अवधारणामा धनगढी प्रिमियर लिग (डिपिएल) आयोजना गरेको थियो ।

यसबाहेक एसपिए कपले पनि नेपालको घरेलु क्रिकेटमा योगदान दिएको छ । शाहीले साझेदारीलाई निरन्तरता दिन पाउँदा गर्व महसुस गरेको बताए ।

एसपीए कलेजले शिक्षा र खेलकुदलाई सँगसँगै अघि बढाउने कार्य गरिरहेको छ। पहिलो सिजनदेखि नै एसपिए कलेजले टिमसँग सहकार्य गर्दै आएकोमा थप २ सिजन यो साझेदारी रहनेछ ।

‘हामीले देखेका छौं कि खेलकुदले युवालाई प्रेरणा दिने ठूलो क्षमता राख्छ। सुदूरपश्चिम रोयल्ससँगको सहकार्यले हामीलाई कक्षा कोठा बाहिर पनि विद्यार्थीलाई सहयोग गर्न सक्ने अवसर दिएको छ,’ प्रबन्ध निर्देशक शाहीले बताए ।

एसपिए हालै मलेसियामा भएको एसिसी यु–१६ इस्ट जोन कप जित्दा टोलीमा रहेका सुदूरपश्चिमका दुई खेलाडीहरुलाई जनही २५ रुपैयाँ हजार सहित सम्मान गरेको थियो ।

‘सुदूरपश्चिम परिवार सुवाश शाहीप्रति अत्यन्त आभारी छ। फाप्ला अन्तर्राष्ट्रिय क्रिकेट रंगशालाको उहाँको दृष्टिकोणले हालसालै नयाँ गति पाएको छ । हामी एक फ्रेन्चाइजका रूपमा त्यसलाई समर्थन गर्न पाउँदा गर्व महसुस गर्छौं। विगत वर्षहरूमा क्रिकेटप्रति उहाँको उत्साह र हाम्रो टिमप्रतिको समर्थनले सुदूरपश्चिम क्रिकेटलाई एक ब्रान्डका रुपमा स्थापित गर्न मद्दत गरेको छ,’ सुदूरपश्चिम सिइओ प्रकाश खड्काले भने ।

खड्काले आगामी वर्षहरूमा पनि यस साझेदारीलाई निरन्तरता दिन उत्सुक रहेको बताए । एसपिएको नेतृत्वमा आयोजना हुने फ्रेन्चाइज लिगमा सुदूरपश्चिमको सहभागिता रहन सक्ने बताए ।