एजेन्सी – पाकिस्तान च्याम्पियन्सले इङ्ग्ल्याण्डमा जारी वर्ल्ड च्याम्पियनसिप अफ लिजेन्डमा अर्को जित हासिल गरेको छ ।

लेस्टरमा मंगलवार पाकिस्तानले लगातार चौथो जित निकाल्ने क्रममा अस्ट्रेलिया च्याम्पियन्सलाई १० विकेटको फराकिलो अन्तरले पराजित गर्यो ।

७५ रनको सामान्य लक्ष्य पाकिस्तानले ७.५ ओभरमा कुनै विकेट नगुमाई पूरा गर्यो । पाकिस्तान च्याम्पियन्सका ओपनरद्वय शर्जिल खान र सहिब मक्सुद अविजित रहे ।

खानले २३ बलमा ५ चौकाको सहयोगमा अविजित रुपमा सर्वाधिक रुपमा ३२ रन बनाए । सहिब मक्सुदले २६ बलमा ४ चौकाको सहयोगमा अविजित २८ रन जोडे ।

अस्ट्रेलिया च्याम्पियन्सले ५ बलरको प्रयोग गरेपनि कुनै विकेट निकाल्न सकेनन् ।

त्यसअघि टस हारेर पहिले ब्याटिङ गरेको अस्ट्रेलिया च्याम्पियन्सले ११.५ ओभरमा सबै विकेट गुमाएर ७४ रनमा समेटियो । अस्ट्रेलिया च्याम्पियन्सका लागि बेन डुकले १४ बलमा ३ चौका र २ छक्काको सहयोगमा २६ रन बनाए।

कलुम फर्गुसन १५ बलमा १० रनमा आउट भए । अस्ट्रेलियाका अन्य ब्याटरले दोहोरो अंकमा रन बनाउन सकेनन् ।

पाकिस्तान च्याम्पियन्सका सइद अजमलले ३.५ ओभरमा १६ रन खर्चिएर ६ विकेट लिए । इमाद वासिमले २ तथा सोहेल तन्विर र सोहेल खानले समान १ विकेट लिए ।

पाकिस्तान च्याम्पियन्स ९ अंकका साथ शीर्ष स्थानमा छ । अस्ट्रेलिया ५ अंक साथ तेस्रो स्थानमा छ । राउण्ड रोबिन लिगका आधारमा हुने प्रतियोगिताको शीर्ष ४ टोली सेमिफाइनलमा पुग्नेछन् ।

प्रतियोगितामा अन्तर्राष्ट्रिय क्रिकेटबाट सन्यास लिएका क्रिकेटरको सहभागिता छ। प्रतियोगितामा ६ टोलीको सहभागी छन् । प्रतियोगिताको फाइनल अगस्ट २ मा हुनेछ ।