काठमाडौं (हाम्रो खेलकुद) – नेपाली महिला राष्ट्रिय क्रिकेट टोलीले आईसीसी महिला विश्वकप छनोट एसिया क्षेत्र प्रतियोगिताको पाँचौ खेलमा चीनलाई ५ रनले पराजित गरेको छ ।

नेपालले प्रस्तुत गरेको ७८ रनको लक्ष्य पछ्याउने क्रममा चीनले २० ओभरमा ६ विकेट गुमाउँदै ७२ रनमात्र जोड्न सक्यो । चीनका लागि मध्यक्रममा झाङ मेइ ३२ रनमा नटअाउट रहिन् । अोपनर चिया झुले १८ रन जोडिन् । नेपालका लागि सिता रानामगरले ३ विकेट हात पारिन्।

त्यसअघि नेपालले औसत ब्याटिङ गर्दै २० ओभरमा ९ विकेटको क्षतिमा ७७ रन जोडेको थियो । ओपनर काजल श्रेष्ठले सर्वाधिक १८ रनको योगदान दिँदा सिता रानामगर र बिन्दु रावलले क्रमश: ११ र १० रन जोडे । अन्य ब्याट्सम्यानले दोहोरो अंकमा रन जोड्न सकेनन् । पहिलो विकेटका लागि ३२ रन जोडेको नेपालले त्यसपछि भने लगातार विकेट गुमाएको थियो । चीनका लागि वाङ मेङ र हान लिलीले २-२ विकेट लिएका थिए ।

नेपाल प्रतियोगिताको ५ खेलमा ४ जित र १ हार बेहोर्दै तेस्रो स्थानमा रहेको छ । शीर्ष स्थानमा रहेको थाईल्यान्डले सबै ५ खेल जितेको छ । प्रतियोगिताको शीर्ष टोली मात्र दोस्रो चरणमा छनोट हुनेछ ।