काठमाडौं (हाम्रो खेलकुद) – अलराउन्डर सीता रानामगरले एनसीसीएस-सिप्यान क्रिकेट अवार्ड २०१९ को उत्कृष्ट महिला खेलाडीको उपाधि जितेकी छिन् । अवार्डसँगै सीताले ६६ हजार रुपैयाँ प्राप्त गरिन् ।

सीताले अवार्ड जित्ने क्रममा राष्ट्रिय महिला क्रिकेट टोलीकी कप्तान रुविना क्षेत्री बेलबसे, करुणा भन्डारी, इन्दु बर्मा र सरिता मगरलाई पाखा लगाइन् । महिला टोलीले पछिल्लो महिना थाइल्यान्डमा भएको महिला टी–२० स्म्यासमा गरेको प्रदर्शनका आधारमा विजेता छनोट गरिएको हो । सितालाई क्यानका पूर्व अध्यक्ष विनयराज पाण्डे, नेपाल खेलकुद पत्रकार मञ्चका अध्यक्ष महेश अाचार्य र क्यानका पूर्व अध्यक्ष रमेश सिलवालले पुरस्कृत गरे ।

सीताले उक्त प्रतियोगितामा उत्कृष्ट अलराउन्ड प्रदर्शन गरेकी थिइन् । सर्वाधिक रन बटुलेकी सीताले ६ खेलमा १ सय ३८ रन जोडीन् । उनले १ सय ७५ बलको सामना गर्दै ११ चौका प्रहार गरेकी थिइन् । बलिङतर्फ पनि सीताले ३.४४ को इकोनोमीमा ४ विकेट हात पारिन् ।

सिताले जितको श्रेय काठमाडौं क्रिकेट ट्रेनिङ सेन्टरलाई दिइन् । उनले अाफ्ना प्रशिक्षक ज्ञानेन्द्र मल्ल, सुधिर महर्जनलगायतलाई विशेष धन्यवाद दिइन् ।