भूपेन्द्र जिसी, काठमाडौं

अन्तर्राष्ट्रिय स्तरमा प्रतिस्पर्धा गर्न थालेको दुई दशक पुग्दा पनि नेपालका लागि ब्याटिङ सधैं चिन्ताको विषय बन्ने गरेको छ । महिला र पुरुषको सिनियर टोली होस् या उमेर समुहको प्रतियोगिता नेपालको ब्याटिङ कमजोर हुँदा थुप्रै पटक ठूला अवसर गुमाएको छ ।

सिनियर टोलीमा पछिल्लो दशक पारस खड्का, ज्ञानेन्द्र मल्ल र शरद भेषावकरले ब्याटिङको जिम्मेवारी निर्वाह गरे । पछिल्लो समय दीपेन्द्रसिंह ऐरी त्यस सुचिमा जोडिएका छन् । रोहितकुमार पौडेलले पनि सुरुवाती खेलमा लय समात्दै केहि आशा देखाएका छन् । अझैपनि नेपाली ब्याटिङमा पूर्ण रुपमा विश्वास गर्न मिल्ने अवस्थामा भने बनेको छैन ।

फ्रेन्चाइज लिगमा अधिकांश टोलीले विदेशी खेलाडीका रुपमा ब्याट्सम्यानलाई प्राथमिकता दिँदा कमै नेपाली ब्याट्सम्यानले प्रभाव जमाउने अवसर पाएका छन् । अवसर पाएका अधिकांश ब्याट्सम्यान सफल हुन सकेका छैनन् । उमेर समुहका प्रतियोगितादेखि नै नेपाली बलरहरुले राम्रो छाप छाड्दा ब्याटिङमा विरलै राम्रो प्रर्दशन देखिन्छ ।

सुमित महर्जन नेपाली क्रिकेटमा नयाँ नाम होइनन् । सन् २०१४ मा नेपालको यू-१६ टोलीको कप्तानी सम्हालेका सुमित त्यसपछि भने केहि समय हराए । पछिल्लो समय घरेलु क्रिकेटमा राम्रो प्रर्दशन गर्दै सुमितले शीर्ष श्रेणीको क्रिकेटमा आफ्नो क्षमता देखाएका छन् । काठमाडौंमा जारी तेस्रो संस्करणको प्रधानमन्त्री एक दिवसिय क्रिकेट प्रतियोगितामा एपीएफबाट खेल्दै राम्रो सुरुवात पाएका सुमितले पछिल्ला खेलमा भने त्यसलाई निरन्तरता दिन सकेनन् । तर उनले आफ्नो खेल्ने शैलीबाट भने नेपाली क्रिकेटलाई केहि आशा देखाएका छन् ।

सुमितले प्रतियोगिताको पहिलो खेलमै पारस खड्का कप्तान रहेको प्रदेश ३ विरुद्ध ९४ रनको दमदार इनिङ खेले । कमजोर सुरुवात पाएको एपीएफलाई सम्हाल्ने क्रममा सुमितले लगातार रन जोड्दै विपक्षीलाई दबाबमा राख्न सफल भएका थिए । तर दुर्भाग्य भन्नुपर्छ पृथु बास्कोटासँग रनमा तालमेल गर्न नसक्दा १ सय ३ बलमा ५ चौका र ६ छक्का प्रहार गर्दै सुमित ९४ रनको अवस्थामा रन आउट हुन पुगे । आत्माविश्वासी सट र दबाबमा रन बटुल्न सक्ने क्षमता उनमा अब्बल देखिन्थ्यो ।

‘त्यो समय शतक सोचेको थिएन, क्रिजमा जमेको अवस्थामा जति सक्यो रन जोड्नुपर्छ जस्तो मात्र लागेको थियो । तर दुर्भाग्य भन्नुपर्छ रन आउट हुन पुगे । शतक बनाउन चुक्दा घरमा पुगेपछिमात्रै पछुतो लाग्यो,’ सुमितले भने ।

झन्डै तीन वर्षअघि पहिलो संस्करणको धनगढी प्रिमियर लिगबाट फ्रेन्चाइज लिगमा काठमाडौं गोल्डेन्सबाट प्रतिनिधित्व गर्दै सुमितले ६ खेलमा १ सय १९ रन जोडेका थिए । तर त्यसपछि उचित अवसर नपाउँदा सुमित प्रशिक्षणमा मात्र सिमित रहे । उमेर समूहका उचित प्रतियोगिता नहुँदा सिनियर क्रिकेटमा राम्रो सुरुवात पाएका सुमितले आफ्नो लयलाई निरन्तरता दिन सकेनन् । उनले उमेर समूहको यु-१९ टोलीमा पनि स्थान बनाउन असफल रहे ।

लामो समयको प्रतीक्षापछि गत पुसमा सम्पन्न एभरेष्ट प्रिमियर लिगमा पनि उनले विराटनगर वारिसर्यबाट खेल्दै राम्रो प्रभाव छाडे । लगत्तै माघमा भएको तेस्रो संस्करणको डीपीएलमा पनि रुपन्देही च्यालेन्जर्सबाट प्रतिनिधित्व गर्दै सर्वाधिक रन बनाउने खेलाडीमा पाँचौ स्थानमा रहे ।

सन् २०१५ मा नेपालको यू-१६ कप्तानको भुमिका निर्वाह गरिसकेका सुमितले त्यसपछि भने यू-१९ टोलीमा स्थान बनाउन सकेनन् । यू-१६ मा उनको कप्तानीमा नेपालले एसीसी इस्टर्न रिजन यू-१६ को उपाधि जितेको थियो । उनको खेल्ने शैली हेर्दा धेरैले उनलाई यू१९ पनि प्रतिनिधित्व गर्न सक्ने अनुमान गरेका थिए । तर उनले यू१९ टोलीमै स्थान बनाउन सकेनन् ।

सुमित आफ्नै कारण यू-१९ उमेर समूहमा खेल्न नसकेको स्विकार्छन् । ‘त्यो समयमा राम्रो प्रर्दशननै गर्नै सकिन । यू-१६ मा पनि खासै रन बटुल्न सकेको थिइन । मिहिनेत कम थियो । अहिले राम्रो हुन थालेको छ। ‘, सुमितले भने । उमेर समूहका प्रतियोगिता उचित संख्यामा नहुनु पनि उदाउँदा प्रतिभा प्रस्फुटन नहुनुमा मुख्य अड्चन देखिन्छ । भएका अधिकांश प्रतियोगिता टि-२० पद्दतिमा हुँदा खेलाडीको शैलीमा पनि समस्या देखिन्छ ।

पछिल्लो समय राम्रो प्रर्दशन गर्नुमा राष्ट्रिय टोलीका उपकप्तान ज्ञानेन्द्र मल्लको भुमिका निकै महत्त्वपूर्ण छ । मल्लले नै सञ्चालन गरेको काठमाडौं क्रिकेट टेनिङ सेन्टरबाटै क्रिकेट सिक्न थालेका सुमित अहिले पनि त्यहीं प्रशिक्षण गर्ने गर्दछन् । ‘मेरो क्रिकेटको सूरुवातनै केसीटिसीबाट भएको हो । यहाँ आएपछि ज्ञानेन्द्र दाईको भुमिका महत्वपूर्ण हुने नै भयो । नयाँ नयाँ कुरा सिकाउनु हुन्छ । मैले जेजति मौका पाई रहेको छु,त्यो सबै केसीटिसी र ज्ञानेन्द्र दाईले गर्दा भएको हो । त्यसैले मेरो यात्राको सबै श्रेय केसीटिसीलाई दिन चाहान्छु’, उनले भने ।

हरेक खेलाडी झैं सुमितले पनि सिनियर राष्ट्रिय टोलीबाट खेल्ने सपना देखेका छन् । त्यो भन्दा पहिला घरेलु प्रतियोगितामा प्रत्येक खेलमा राम्रो प्रर्दशन गर्न आवश्यक पर्ने सुमितले बुझेका छन् । ‘ पीएम कपको पहिलो खेलमा शतक मिस भयो । अब त्यो भन्दा राम्रो प्रर्दशन गर्नसक्नुपर्छ । घरेलु प्रतियोगितामा राम्रो प्रर्दशन गर्नुपर्छ । सिनियर टोलीको बन्द प्रशिक्षणमा पर्न सके धेरै कुरा सिक्ने अवसर पाइन्छ । यसले आफूलाई अझै तयारी गर्ने मौका मिल्छ ,’ सुमितले भने ।

को हुन् सुमित महर्जन ?

सुमित ललितपुर जिल्लाको महालक्ष्मी नगरपालिका सिद्धिपुर वडा नम्बर ६ मा बुबा बावुराम महर्जन र आमा संगिता श्रेष्ठ महर्जनबाट पहिलो सन्तानका रुपमा जन्मिएका हुन् । सानै उमेरदेखि खेलकुदमा रुची राख्ने सुमित पहिला क्रिकेटभन्दा फुटबल, भलिबल र टेबलटेनिस बढि खेल्थे ।

२०६९ सालमा एसएलसी दिएपछि बानेश्वरको एक कलेजले २–३ महिना कप्तान पारस खड्काले प्रशिक्षण गराउने भनेपछि उनि त्यो कलेज पुगे । कलेजबाट उनिहरुलाई प्रशिक्षणको लागि केसीटिसीमानै लगेर प्रशिक्षण गराईने रहेछ ।

सुमित उक्त छोटो प्रशिक्षण सकेपछि केसिटिसीमै भर्ना भए । त्यसपछि उनले नेपाली यू-१६ टोलीको कप्तान समेत बने । तर त्यसपछि अवसरको कमी र खराब प्रदर्शनका कारण यू-१९ मा उनले स्थान बनाउन सकेनन् । यू१९ मा स्थान नपाउनु उनको लागि थप प्रेरणाको स्रोत बन्यो र आफ्नो प्रर्दशनमा मेहनत बढाउँदै लगे ।

सुमितले घरेलु क्रिकेटका रुपमा पहिलो संस्करणको डीपीएलमा काठमाडौं गोल्डेन्सबाट प्रतिनिधित्व गर्दै राम्रो प्रभाव छाडे । गत पुसमा सम्पन्न एभरेष्ट प्रिमियर लिगमा पनि विराटनगर वारिसर्यबाट प्रतिनिधित्व गरे । उनले विभागिय टोली एपीएफबाट क्रिकेट खेल्न थालेको १ वर्ष पुग्न लागिसक्यो । घरेलु लिगमा उनको प्रर्दशन सन्तोषजनक नै छ । उनी रोलवालिङ कलेज कुमारीपाटीबाट स्नातक (ब्याचलर) पढाई सकेर बसेका छन् ।

सुमितले अब घरेलु प्रतियोगितामा राम्रो प्रर्दशन गर्दै सिनियर टिमको बन्द प्रशिक्षण हुँदै राष्ट्रिय टोलीमा स्थान बनाउने लक्ष्य राखेका छन् । वान डे मान्यता पाएको अवस्थामा आगमी तीन वर्ष नेपाली क्रिकेट अन्तर्राष्ट्रिय प्रतियोगितामा व्यस्त रहनेछ । यो अवस्थामा सुमित जस्ता युवा प्रतिभालाई उचित रुपमा तयार पार्न सके ब्याटिङ समस्याले ग्रस्त नेपाली टोलीलाई केहि राहत मिल्नेछ । पाएको अवसरमा राम्रो प्रदर्शन गर्न सुमित आउने दिनमा प्रशिक्षणमा थप मिहिनेत गर्ने बताउँछन् ।