काठमाडौं (हाम्रो खेलकुद) – तेस्रो संस्करणको प्रधानमन्त्री राष्ट्रिय एक दिवसिय क्रिकेट प्रतियोगिताको व्यक्तिगत विधागर्तका अवार्ड विजेताले यसअघि घोषणा गरेको भन्दा निकै कम पुरस्कार पाउने भएका छन् ।।

पीएम कपमा म्यान अफ द सिरिज नेपाल पुलिसका युवा स्पिनर ललित नरायण राजवंशी घोषित भए । यसअघि गरिंदै आएको घोषणाअनुसार ललितले म्यान अफ द सिरिज वापत एक थान मोटरसाइकल पाउनुपर्ने थियो । तर उनले ५० हजार रुपैयाँ मात्र पाए । ललित नै प्रतियोगिताको सर्वोत्कृष्ट बलर पनि घोषित भए । यसअघि घोषणा अनुसार उनले ५० हजार प्राप्त गर्नु पर्ने थियो । तर उनले ३० हजार मात्र प्राप्त गरे । पुलिसलाई च्याम्पियन बनाउन उनले उनले ६ खेलमा ४०.३ ओभरमा ८ मेडन सहित १ सय २३ रन खर्चेर २० विकेट लिए । उनको इकोनमि रेट २.८९ रहेको थियो ।

त्यस्तै प्रतियोगिताकै सर्वोत्कृष्ट ब्याट्सम्यान आर्मीका विकेटकीपर राजु रिजाल चुनिए । उनले पनि यस अघि घोषणा अनुसारको पुरस्कार रकम पाएनन् । यस अघि ५० हजार प्राप्त गर्ने भने पनि उनलाई ३० हजार मात्र दिईएको छ । आर्मीलाई फाईनल सम्म पुर्याउन उत्कृष्ट प्रर्दशन गरेका राजुले ६ खेलमा ४३.५० को औसतामा कुल २ सय ६१ रन बनाउनै शीर्ष स्थानमा रहे । जसमा ३ अर्ध शतक सहित वेस्ट प्रर्दशन ९० रह्यो । प्रतियोगिताको उदियमान खेलाडी सुदुरपश्चिमका खडक बोहोरा भए ।

शनिवार टियु क्रिकेट मैदानमा आर्मीलाई ४ विकेटले हराउँदै पुलिसले उपाधि जितेको थियो । टस जितेर पहिला ब्याटिङ थालेको आर्मीले ३३.३ ओभरमा अल आउट हुँदै १ सय २५ रनमा समेटिएको थियो । १ सय २६ रनको लक्ष्य पुलिसले ४०.३ ओभरमा ६ विकेटको क्षतिमा पुरा गर्यो । विजेता पुलिसले २० लाख प्राप्त गर्यो । उप विजेता बनेको आर्मीले १० लाख नगदमा चित्त बुझायो ।