काठमाडौं (हाम्रो खेलकुद) – गत फागुनमा एनसीएल स्पोट्रस प्रालिले एक पत्रकार सम्मेलन गर्दै चैत्रमा १ देखि ९ गते सम्म एनसीएल वोमन्स टी ट्वान्टी क्रिकेट लिग प्रतियोगिता गर्ने घोषणा गर्यो ।

नेपालमै पहिलो पटक फ्रेन्चाइज पद्दतिमा रहेर प्रतियोगिता आयोजना हुने भएपछि नेपाली महिला क्रिकेटमा एक नयाँ खुसी र उत्साह छायो । अन्तर्राष्ट्रिय प्रतियोगिता चाडपर्व जस्तै वर्षमा एक दुई पटक हुने नेपाली महिला क्रिकेटको लागि यस प्रतियोगिताले धेरै खुसी दिएको थियो । घरेलु प्रतियोगिता शुन्यप्राय रहेको अवस्थामा पहिलोपटक अक्सनमा आधारित एनसीएल वुमन्स टि-२० लिग गर्ने भनिएपछि नेपाली महिला क्रिकेटर खुसी हुनु स्वभाविक पनि थियो । तर चौथो पटक मिती परिवर्तन हुँदासम्म प्रतियोगिता कहिले हुने भन्ने अनिश्चित छ । कतै प्रतियोगिता नै नहुने हो की भन्न शंका पनि उत्पन्न हुन थालेको छ ।

चैत्र १ गते देखि ९ सम्म विराटनगरको बैजानाथपुरमा हुने भनिएको प्रतियोगिता प्राविधिक कारण देखाउँदै आयोजकले वैशाख ७ देखि १४ सम्मलाई सारेको थियो । चैत्र पहिलो साता पुन: एक पत्रकार सम्मेलन गर्दै आयोजकले वैशाख ७ देखि १४ सम्म आठौं राष्ट्रिय खेलकुदसँग जुध्न पुगेको भन्दै मिती परिवर्तन गर्दै जेठ ६ देखि १३ गते सम्म काठमाडौंको कीर्तिपुरमा हुने जनायो । तर फेरि त्यहि समयमा प्रधानमन्त्री कप एकदिवसिय क्रिकेट प्रतियोगिता सुरु हुने भन्दै चौथो पटक मिती परिवर्तन गर्दै जेठ २४ गते देखी ३० गते सम्म हुने बताईएको थियो । तर आज जेठको ३० गते पुग्दा सम्म आयोजकले हाल सम्म कुनै आधिकारीक धारणा सार्वजनिक गरेको छैन ।

त्यसअघि आयोजकले चैत्रमा पहिलो साता चार शहरका चार टोलीको नाम,मार्की खेलाडी र टोलीका मालिक घोषणा गरेको थियो । घोषणा अनुसार विराटनगर रोअरिङ, भैरहवा क्विन्स, धनगढी वन्डर वुमन र काठमाडौं सुपर च्याम्पियन्सले प्रतिस्पर्धा गर्ने तालिका रहेको थियो । राष्ट्रिय टोलीकी कप्तान रुविना क्षेत्री भैरहवा, धनगढीमा सिता राना मगर,काठमाडौंमा नेरि थापा र विराटनगरमा करुणा भण्डारीलाई एक पत्रकार सम्मेलनमा चिठ्ठा मार्फत मार्की खेलाडी घोषणा गरिएको थियो ।

टोली मालिकका रुपमा विराटनगरका अनुप सक्सेना, भैरहवाका दिपक सुबेदी र अनिल भण्डारी, धनगढीका हरि खनाल र काठमाडौंकी नायिक रेखा थापालाई सार्वजनिक गरिएको थियो । यति मात्र होइन आयोजकले चैत्र १७ मा काठमाडौंमा एक अक्सन गरि कुल ८० जना खेलाडीबाट हरेक टोलीले १३–१३ जना गरि अनुबन्ध समेत गराएको थियो । अक्सनसँगै प्रतियोगिता समयमै हुनेमा धेरै खेलाडी र समर्थक थप aआशावादी बनेका थिए । तर बारम्बार मिति परिवर्तन हुँदा त्यो आसा निराशामा बदलिन थालेको छ ।

असार ४ देखि १० सम्म महेन्द्रनगरमा प्रधानमन्त्री महिला टी ट्वान्टी प्रतियोगिता हुँदै छ । यो अवस्थामा अहिले नै यो प्रतियोगिता सम्भव छैन । त्यसपछि वर्षा ऋतु सुरु हुने हुँदा असार र साउनमा प्रतियोगिता हुन संभव छैन ।

यो सबका बाबजुद एनसीएल स्पोट्र्स प्रालीका प्रबन्ध निर्देशक जयराज रोयले प्रतियोगिता गरेरै छाड्ने बताए । तर कहिले गर्ने भन्नेमा उनी आफैंसँग जवाफ छैन । ‘प्रतियोगिता हुन्छ । हामी जसरी पनि गछौं । नयाँ मिति लगायत सबै कुराको निर्णय एक हप्ता भित्रमा पत्रकार सम्मेलन गरेर जानकारी दिने तयारीमा छौं,’ रोयले हाम्रो खेलकुदसँग भने । यता नेपाली राष्ट्रिय टोलीका प्रशिक्षक जगट टमाटा भने आयोजकले भदौसम्म प्रतियोगिता गर्ने तयारी गरेको बताउँछन् ।

महिला घरेलु प्रतियोगिता शून्यजस्तै भएको बेला एनसीएल वुमन्स टी ट्वान्टी लिग जस्ता प्रतियोगिता घोषणा हुनु महिला क्रिकेटरको लागि खुसीको कुरा हो । यसले घट्दो नेपाली महिला क्रिकेटको लोकप्रियतालाई केहि हदसम्म रोक्न सक्छ । तर बारम्बार मिति परिवर्तन हुनाले खेलाडी, मालिक र समर्थकमा प्रतियोगिता हुने मै शंका उत्पन्न भएको छ ।