एजेन्सी – युवा ब्याट्सम्यान तथा विकेटकिपर शाई होपको उत्कृष्ट ब्याटिङसँगै एक दिवसिय विश्वकप क्रिकेट प्रतियोगिता अन्तर्गत सोमबारको खेलमा वेस्ट इन्डिजले बंगलादेशलाई ३ सय २२ रनको विशाल लक्ष्य दिएको छ ।
टस हारेर पहिला ब्याटिङको निम्तो पाएको वेस्ट इन्डिजले निर्धारित ५० ओभरमा ८ विकेटको क्षतिमा ३ सय २१ रन बनायो । वेस्ट इन्डिजलाई ठूलो योगफल तयार पार्न शाई होपले उत्कृष्ट ब्याटिङ गरे । आफ्नो वान डे करियरको सातौं शतक पुरा गर्न ४ रनले चुकेका होपले १ सय २१ बलमा ४ चौका र १ छक्का सहित ९६ रन बटुले ।
४७ ओभरको अन्तिम बलमा मुस्ताफिजुर रहमानले लिटन दासबाट क्याच आउट गराएपछि होप विश्वकपमा आफ्नो पहिलो शतक बनाउन चुकेका थिए । चौथो ओभरको दोस्रो बलमा मोहम्मद सैफुद्दीनले क्रिस गेललाई शुन्यमा क्याच आउट गराए ।
गेलले १३ बलको सामना गर्दा खाता खोल्न सकेनन् । दोस्रो विकेटका लागि इभिन लुइस र शाई होपले १ सय १६ रनको शतकीय साझेदारी गर्दै इनिङ उकासेका थिए । २५ ओभरको तेस्रो बलमा सबिक अल हसनले क्याच आउट गराउनु अघि लुईले ७० रन जोडे ।
लुईसले ६७ बलमा ६ चौका २ छक्का प्रहार गरे । सकिबलेनै निकोलस पुनरलाई २५ रनमा क्याच आउट गराए । चौथो विकेटका लागि होप र शिमरोन हिटमायरले ८३ रनको साझेदारी गरेपछि वेस्ट इन्डिज बलियो योगफलमा पुगेको थियो ।
४० ओभरको तेस्रो बलमा मुस्ताफिजुर रहमानले तामिम इकवालबाट क्याच गराउँदै हिटमायरलाई ५० रनमा पेभिलिएन फर्काए । आक्रमक ब्याटिङ गरेका हिटमायरले २६ बलमा ४ चौका र ३ छक्का प्रहार गरे । मुस्ताफिुजर रहमानलेनै आन्द्रे रसेललाई शुन्यमा क्याच आउट गराए ।
तल्लोक्रममा कप्तान जोसन होल्डरले १५ बलमा ४ चौका र २ छक्का सहित ३३ रन जोडे । ड्रेन ब्राभो १९ र ओशन थोमसले ६ रन जोडे । बंगलादेशका लागि मुस्ताफिजुर रहमानले ९ ओभरमा रन ५९ खर्चेर ३ विकेट लिए ।
मोहम्मद सैफुद्दीनले १० ओभरमा १ मेडन सहित ७२ रन खर्चेर ३ विकेट हात पारे । सकिब हल हसनको नाममा पनि २ विकेट रह्यो ।
