काठमाडौं (हाम्रो खेलकुद) – नेपालले एसीसी यू१९ इस्टर्न रिजनको सेमिफाइनल खेलमा घरेलु टोली मलेसियाविरुद्ध पहिला फल्डिङ गर्ने भएको छ ।

किनारारा ओभल क्रिकेट मैदानमा टस जितेर कप्तान रोहित कुमार पौडेलले फिल्डिङ गर्ने निर्णय लिएका हुन् । नेपालले आजको खेलमा एक खेलाडी परिवर्तन गरेको छ । विशाल विक्रम केसीको स्थानमा तीब्र गतिक बलर कमलसिंह ऐरीलाई मौका दिएको छ । विशालसँगै प्रतिस जिसी र लोकेश बहादुर बमलाई बेन्चमा राखेको छ । आज अर्को सेमिफाइनलमा हङकङ र सिंगापुर पनि भिड्दै छन् । हङकङ समुह बी को विजेता र घरेलु टोली मलेसिया उप विजेता हो । नेपाल समुह ए को विजता र सिंगापुर उप विजेता हुन् ।

नेपालले समुह चरणमा चीनलाई १० विकेट र सिंगापुरलाई २ सय १७ रनले पराजित गरेको थियो । मलेसियाले समुह चरणमा भुटानलाई २ सय ६० रनले पराजित गर्दा थाईल्यान्डमाथि १६ रनको जित निकालेको थियो । समुह चरणको अन्तिम खेलमा हङकङसँग ३ रनले पराजित हुँदा उप विजता बन्नु परेको हो । नेपालले मलेसियामाथि निरन्तर जित निकाल्दै आएको छ ।

यस प्रतियोगिताको विजेता टोलीले २८ अगस्ट देखी ८ सेप्टेम्बरसम्म श्रीलंकामा हुने एसिया कप खेल्न पाउने छ । यस प्रतियोगिताको विजेतासँगै भारत, पाकिस्तान, बंगलादेश, अफगानिस्तान, यूएई र कुवेतले एसिया कपमा प्रतिस्पर्धा गर्ने छन् ।

नेपालको प्लेइङ ११ :
१.रोहित कुमार पौडेल (कप्तान)
२.पवन सरार्फ
३.राशिद खान
४.रित गौतम
५.हरि बहादुर चौहान
६.कमल सिंह ऐरी
७.तिलक भण्डारी
८.भिम सार्की
९.कुशल मल्ल
१०.सागर ढकाल
११.खडक बहादुर बोहरा