सुबास हुमागाईं, सिंगापुर

नेपाली राष्ट्रिय क्रिकेट टोलीका मध्यक्रमका भरपर्दा ब्याट्सम्यान दीपेन्द्रसिंह ऐरी सोमबारदेखि सुरु हुने टि-२० विश्वकप २०२० को एसिया क्षेत्र छनोटका लागि फिट भएका छन् ।

मलेसियामा १० दिन प्रशिक्षण र मैत्रीपूर्ण खेल खेलेर नेपाली टोली शनिबार सिंगापुर आइपुगेको थियो । नेपाली टोलीले आइतबार नै प्रतियोगिता आयोजना हुने सिंगापुर इन्डियन एसोसियसनको मैदानमा प्रशिक्षण गरेको छ । प्रशिक्षणमा मध्यक्रमका ब्याट्सम्यान दीपेन्द्रसिंह ऐरीले पूर्ण प्रशिक्षण गरे । उनले नेट्समा थ्रो डाउन, स्पिन र पेस बलरको सामना गरेका थिए ।

दीपेन्द्र दुई महिनाअघि नेपालमा आयोजित प्रधानमन्त्री कप एकदिवसीय क्रिकेट प्रतियोगिताको दौरान घाइते भएका थिए । त्यसयता उनले प्रशिक्षणमा सहभागी जनाएपनि पूर्ण प्रशिक्षण भने गरेका थिएनन् । मलेसियामा भएको दुई मैत्रीपूर्ण खेलमा पनि दीपेन्द्रले सहभागिता जनाएका थिएनन् । उनलाई विश्वकप छनोटको तयारीका लागि विश्राम दिइएको थियो ।

नेपालले प्रतियोगिताको पहिलो खेलमा मंगलबार कतारको सामना गर्दैछ । उक्त खेलका लागि दीपेन्द्र फिट रहेका छन् । नेपालले पहिलो रोजाइको टोली नै उतार्ने बताइरहँदा दीपेन्द्रले खेल्ने सम्भावना बलियो रहेको छ ।

नेपाली टोली : पारस खड्का(कप्तान), ज्ञानेन्द्र मल्ल, शरद भेषावकर, वसन्त रेग्मी, सोमपाल कामी, दीपेन्द्रसिंह ऐरी, प्रदीप ऐरी, सन्दीप लामिछाने, रोहित कुमार पौडेल, पवन सरार्फ, अभिनाष बोहोरा, विनोद भण्डारी, करण केसी र ललित नारायण राजवंशी

नेपालको खेल तालिका :
जुलाई २३ मा कतार
जुलाई २४ मा मलेसिया
जुलाई २७ मा कुवेत
जुलाई २८ मा सिंगापुर

नेपालको प्रशिक्षणको भिडियो :