काठमाडौं (हाम्रो खेलकुद) – आईसीसी टि-२० विश्वकपको एसिया छनोट प्रतियोगिता सोमबारदेखि सिंगापुरमा सुरु भएको छ ।

आयोजक सिंगापुरसहित नेपाल, कतार, मलेसिया र कुवेत सहभागि प्रतियोगिताको शीर्ष टोलीले आगामी अक्टोबरमा यूएईमा हुने ग्लोबल छनोटमा प्रतिस्पर्धा गर्न पाउने छ । ग्लोबल छनोटमा विभिन्न क्षेत्रबाट आएका १४ देशमध्य उत्कृष्ट प्रर्दशन गर्ने ६ टोलीले आगमी वर्ष अष्ट्रेलियामा हुने टी ट्वान्टी विश्वकप खेल्न पाउने छन् ।

मलेसियाबाट १० दिने विशेष प्रशिक्षण र दुई टी ट्वान्टी सिरिज क्लिनस्वीप गर्दै शनिबार नेपाली टोली सिंगापुर पुगिसकेको छ । नेपालले मलेसियासँगको सिरिज क्लिन स्विप गरेपनि आफ्नो स्तर अनुसार प्रर्दशन गर्न भने सकेन ।

नेपाल यस प्रतियोगिताकै सर्वाधिक बलियो टोली हो । नेपाल अन्य चार टोलीभन्दा निकै अब्बल देखिन्छ । कमजोर टोलीमाथि नेपालले सहज जितसँगै थुप्रै कीर्तिमान बनाउन सक्ने अनुमान गरिएको छ । नेपाली खेलाडी र टिम दुबैलाई कीर्तिमान बनाउने राम्रो अवसर पनि हो ।

नेपालले यस प्रतियोगिताको उपाधि जित्दै आगमी अक्टोबरमा यूएईमा हुने ग्लोबल टी ट्वान्टी विश्वकप छनोट खेल्न सक्ने यी चार बलिया आधार पनि छन् ।

४. पारसको उत्कृष्ट लय

नेपाली राष्ट्रिय टोलीमा कप्तान पारस खड्कालाई धेरैले ‘वान म्यान आर्मी’ अर्थात एकल योद्धा भन्ने गर्दछन् । पछिल्लो समय पारस उत्कृष्ट लयमा छन् । पारस लयमा हुनु नेपालको लागि बलियो पक्ष्य हो । नेपालको अधिकांश जित कप्तान पारसको प्रर्दशनमा निर्णायक रहने गर्दछ । पारसले उत्कृष्ट प्रर्दशन गर्दा अन्य खेलाडीले पनि दबाब महसुस गर्न पाउँदैनन् ।

पारसले एक साता अघि मलेसियासँगको पहिलो खेलमा ८६ रनमा अविजित रहँदै उत्कृष्ट इनिङ खेलेका थिए । दोस्रो खेलमा पनि २३ रन जोड्दै राम्रो सुरुवात दिलाएका थिए । पारसले गत माघमा युएईसँगको तेस्रो वान डे खेलमा उत्कृष्ट शतक प्रहार गरेका थिए । त्यस्तै ऐतिहासिक टी ट्वान्टी सिरिज जिताउन पनि पारसको योयदान महत्वपूर्ण थियो । जुन लयलाई पारसले एसिया विश्वकप छनोटमा पनि निरन्तरता दिने आसा गरिएको छ ।

उत्कृष्ट लयमा रहेका पारस ठूलो इनिङ खेल्दै टोलीको सहज जित पक्का गर्न सक्छन । पारस ब्याटिङमा मात्रै होइन बलिङमा पनि त्यतिनै प्रभावशाली प्रर्दशन गर्ने गर्दछन् । नेपालको जितमा सधैं नायक बन्ने पारसले आफ्नो लयलाई निरन्तरता दिए नेपाल सहजै च्याम्पियन बन्न सक्छ ।

३. मजबुत मध्यक्रम

पछिल्लो समय नेपाली ब्याटिङमा केहि सुधार भएको अनुभुव गर्न सकिन्छ । ओपनङिमा समस्या रहेपनि मध्यक्रम भने मजबुत बन्दै गएको छ । अनुभवी ब्याट्सम्यान शरद भेषवकरसँगै, रोहित कुमार पौडेल, हिटर विनोद भण्डारी, ज्ञानेन्द्र मल्ल मध्यक्रमका बलिया आधार हुन् । ज्ञानेन्द्र बाहेक अन्य सबै खेलाडी राम्रो लयमा छन् । मल्ल पछिल्लो समय खासै राम्रो लयमा छैनन् ।

खराब प्रर्दशनका कारण चर्को आलोचना खेपि रहेका मल्ललाई पनि उत्कृष्ट प्रर्दशन गर्नुपर्ने दबाब त्यतिकै छ । विनोदले मलेसियासँग दोस्रो खेलमा २५ बलमा ५१ रनमा अविजित रहँदै उत्कृष्ट फिनिसिङ गरेका थिए । त्यस्तै गत माघपछि टोलीमा फर्किए शरदले पनि मलेसियासँगको खेलमा राम्रो प्रर्दशन गरे । शरदको आगमनले मध्यक्रम झनैं बलियो बनेको छ । तल्लोक्रममा सोमपाल कामी र करण केसी पनि ठूलो इनिङ खेल्न सक्ने क्षमता राख्छन् । आफ्नो क्षमता अनुसारको प्रर्दशन गर्न सके नेपाल सहजै च्याम्पियन बन्न सक्छ ।

२. टोलीमा कडा प्रतिस्पर्धा

पछिल्लो समय नेपाली टोलीमा स्थान बनाउन खेलाडीमा एकअर्काबीच कडा प्रतिस्पर्धा छ । खराब प्रर्दशन कुनै पनि खेलाडीलाई छुट छैन । यस विश्वकप छनोटमा पनि नेपाली टोलीको बलिङमा उच्च प्रतिस्पर्धा देखिन्छ । स्पिनरको रुपमा सन्दीप लामिछाने, वसन्त रेग्मी र ललित नारायण राजवंशी रहेका छन् । त्यस्तै तीब्र गतिका बलरका रुपमा सोमपाल कामी, करण केसी र अभिनाष बोहोरा छन् । नेपालले कुन कुनलाई मैदान उतार्छ भनेर भन्न कठिन छ ।

मलेसियासँगको पहिलो खेलमा तीनै स्पिनरलाई मैदान उतार्दा अभिनाषलाई बेन्चमा राखेको थियो । दोस्रो खेलमा वसन्त रेग्मीलाई आराम दिदै अभिनाषलाई मौका दिएको थियो । जुन अवसरलाई अभिनाषले चुकाएनन् । अर्थात उत्कृष्ट प्रर्दशन गरेका थिए । बलिङमा नेपालको विकल्प धेरै छ । एक खेलमा खराब प्रर्दशन गर्दा खेलाडी पुरै प्रतियोगिता बाहिर बस्नुपर्ने संभावना पनि उतिकै रहन्छ । त्यसैले हरेक खेलमा सबै खेलाडी उत्कृष्ट प्रर्दशन गर्दै टोलीमा नियमीत स्थान बनाउन चाहान्छन् । जसको फाइदा नेपाललाई पुग्ने छ ।

१. कमजोर प्रतिद्वन्द्वी

एसिया कप छनोटमा नेपालले प्रतिस्पर्धा गर्ने मलेसिया,कतार,कुवेत र सिंगापुर तुलानात्मक रुपमा कमजोर टोली हुन् । यी चारै टोलीमाथि नेपाल निरन्तर हाबी हुँदै आएको छ । नेपालले सन् २०१४ को टि ट्वान्टी विश्वकपनै खेल्दा अन्य चार टोली हालसम्म ग्लोबल छनोटमै पुग्न सकेका छैनन् ।

आईसीसी वरियतामा नेपाल ११, कतार २१, सिंगापुर २३, कुवेत २९ र मलेसिया ३५ औं स्थानमा छ । बलियो नेपाललाई उत्कृष्ट प्रर्दशन गर्न दबाब भने रहने छ । नेपाल अन्य चार टोली भन्दा कागजी,वरियता र प्रर्दशन तीनै कुरामा बलियो देखिन्छ । सहज प्रतिद्धोन्दी पाएको नेपालले आफ्नो क्षमता अनुसार प्रर्दशन गर्न सक्ने उपाधि चुम्न कुनै कठिन देखिदैन ।