सिंगापुर (हाम्रो खेलकुद) – नेपालले आईसीसी एसिया विश्वकप छनोट प्रतियोगिताको पहिलो खेलमा मंगलबार कतारसँग खेल्दै छ । खेल नेपाली समय अनुसार ७:१५ पछि सुरु हुने छ ।

कतारले पहिलो खेलमा सिंगापुरसँग ३३ रनले पराजित हुँदै खराब सुरुवात गरेको छ । कतारमाथि सहज जित निकाल्दै नेपाल भने विजयी सुरुवात गर्न चाहन्छ । कतारलाई अघिल्लो चरणको आसा कायमै राख्न नेपालसँगको खेल जित्नै पर्ने हुन्छ ।

नेपाल यस प्रतियोगिताको उपाधिको एक्लो दाबेदार टोली हो । आईसीसी वरियता देखी कागजी रुपमा र प्रर्दशन तीनैको आधारमा नेपाल अन्य चार टोली भन्दा निकै अब्बल देखिन्छ । यता प्रतियोगितामा आईसीसी वरियतामको हिसाबमा नेपाल पछिको बलियो टोली कतार मानिन्छ । नेपाल आईसीसीको टी ट्वान्टी वरियतामा ११ र कतार २१ औं स्थानमा छ ।

एकै ओभर र एकै खेलाडीले ठूलो प्रभाव पार्ने हुँदा कुनै पनि टोलीलाई कमजोर आक्नुहुँदैन । जतिसुकै बलियो टोलीले पनि मैदानमा जितको लागि उत्कृष्ट प्रर्दशन गर्नुपर्ने हुन्छ । कतारका यी ३ खेलाडी जसको उत्कृष्ट प्रर्दशन नेपाललाई घातक बन्न सक्छ ।

३. तमोर शज्जाद (अलराउन्डर)

२७ वर्षिय तमोर कतारका भरपर्दा अलराउन्डर हुन् । तमोर कतारबाट टी ट्वान्टी आईमा सर्वाधिक रन बनाउने तेस्रो र सर्वाधिक विकेट लिने दोस्रो खेलाडी हुन् । उनले ८ टी ट्वान्टी आईमा १४६.६६ को स्ट्राइक रेटमा कुल २ सय २० रन जोडेका छन् । जसमा २० चौका र ९ छक्का सामेल छ । लेग स्पिनर तमोर आक्रमक ब्याटिङ गर्न माहिर छन् ।

तमोरले सिंगापुरसँगको पहिलो खेलमा २९ बलमा समान २ चौका र छक्का सहित ३४ रनको योगदान दिनुको साथै १ विकेट लिएका थिए । उनले ९ टी ट्वान्टी खेलमा ११ विकेट लिदा ७.३९ को इकोनमिमा रन खर्चिएका छन् । उनले आफ्नो उत्कृष्ट अलराउण्डर प्रर्दशनमा टोलीलाई अविश्वसनिय जिततर्फ लम्काउन सक्छन् ।

२. इकवाल हुसेन (बलर)

तीब्र गतिका बलर इकवाल हुसेन कतारका मुख्य हतियार हुन् । ३० वर्षिय हुसेन कतारका लागि टी ट्वान्टी खेलमा सर्वाधिक विकेट लिने खेलाडी हुन् । उनले ९ खेलमा ९.०३ को इकोनमी रन खर्चिदै कुल १४ विकेट लिएका छन् । हुसेनले सिंगापुरसँगको खेलमा ४ ओभरमा ३३ रन खर्चेर ४ विकेट लिएका थिए । हुसनेले आफ्नो तीब्र गतिमा नेपाली ब्याट्सम्यानलाई निराश बनाउन सक्छन् । नेपाली खेलाडी सतर्क हुन आवश्यक छ ।

१. मोहम्मद तनविर (शीर्षक्रम ब्याट्सम्यान)

३८ वर्षिय मोहम्मद तनविर कतारका सर्वाधिक अनुभवी र भरपर्दा ब्याट्सम्यान हुन् । तनविर कतारबाट टी ट्वान्टी आईमा सर्वाधिक रन बनाउने खेलाडीको सुचिमा शीर्ष स्थानमा पर्दछन् । तनविरले ९ खेलमा ३ अर्ध शतक सहित कुल २ सय ८८ रन बनाएका छन् । जसमा २६ चौका र १६ चौका सामेल रहँदा स्ट्राइक रेट १४७.६९ रहेको छ ।

उनले सिंगापुरसँगको खेलमा २६ रनमा आउट भएका थिए । तनविरले कतारबाट नियमित उत्कृष्ट प्रर्दशन गर्दै आएका छन् । उनले आफ्नो उत्कृष्ट प्रर्दशनमा नेपाललाई बलियो चुनौती दिन सक्छ ।

यो पनि : नेपालले उपाधि जित्न सक्ने ४ आधार

यो पनि : ‘दर्शकको समर्थन हाम्रो बलियो पक्ष’ – कप्तान पारस