सुबास हुमागाईं, सिंगापुर

आईसीसी टि-२० विश्वकप एसिया क्षेत्र छनोट अन्तर्गत आफ्नो दोस्रो खेलमा नेपालले मलेसियाको सामना गर्दैछ ।

निरन्तर वर्षाका कारण खेल रद्द हुने प्रबल सम्भावना रहेको छ । त्यस्तै वर्षा रोकिए पनि टोलीका कप्तान पारस खड्का नखेल्ने भएका छन् । टोलीको कप्तानी ज्ञानेन्द्र मल्लले गर्ने छन् । पारस मंगलबार कतारसँगको खेलमा ढाडमा समस्या आएपछि दोस्रो इनिङमा बाहिर बसेका थिए । उनको स्थानमा दोस्रो इनिङमा पवन सर्राफले पूरै समय फिल्डिङ गरेका थिए ।

पारसले आजको खेल गुमाउदा खण्डमा बिहीबार र शुक्रबार पनि विश्राम लिनेछन् । नेपालले अन्तिम दुई खेल शनिबार र आइतबार आयोजक सिंगापुर र कुवेतसँग खेल्नेछ ।

मौसम पूर्वानुमानका अनुसार स्थानीय समय २ बजेसम्म वर्षा हुने उल्लेख गरिएको छ । नेपालको खेल सुरु हुन कम्तिमा ११:५७ बजे खेल सुरु हुनु पर्नेछ । नेपाली समय ९:४२ सम्म सुरु हुनुपर्ने० नेपाली टोलीले खेलअघि वार्मअप गरेपनि टस हुनुभन्दा १० मिनेट अगाडिबाट वर्षा सुरु भएको छ । मौसम पूर्वानुमानका अनुसार अब नेपालको खेल अवधिभर वर्षा हुने बलियो सम्भावना रहेको छ ।

वर्षाले मलेसियाविरुद्ध खेल रद्द भएको अवस्थामा नेपाल अर्को चरण पुग्ने अंक गणितीय सम्भावना मात्र रहनेछ । अघिल्लो दिन कतारसँग ४ विकेटले पराजित हुनुको नतिजा नेपालको लागि भारि हुने भएको छ । आजको खेल रद्द भए मलेसियाले बाँकी खेलमा कम्तिमा एक हार भोगे मात्र नेपाल अगाडी बढ्नेछ ।